Idman.biz
Bakıda start götürən FIFA U-15 dünya çempionatı və festivalı yalnız gənc futbolçuların mübarizəsi ilə deyil, dünyanın məşhur klublarının akademiyalarında yetişən istedadların iştirakı ilə də diqqət çəkir. "Real Madrid", "Barselona", "Nottingem Forest", "Qalatasaray", "Fənərbağça" və "Beşiktaş" kimi klubların yetirmələri Azərbaycan paytaxtında keçirilən turnirdə özlərini göstərmək imkanı qazanıblar.
İdman.Biz xəbər verir ki, 189 ölkənin iştirak etdiyi və 945 qarşılaşmanın nəzərdə tutulduğu yarış Avropanın aparıcı klublarının seleksiya xidmətləri üçün də maraqlı imkanlar yaradır. İngiltərə, İspaniya, İtaliya, Almaniya və Niderlandın güclü futbol akademiyalarının belə genişmiqyaslı turniri diqqətdən kənarda qoymayacağı ehtimal olunur.
Madrid və Barselona akademiyalarının istedadları Bakıda
"Real Madrid"in rəsmi məlumatına əsasən, klubun akademiyasının üç üzvü - Adrian Bielsa, Alberto Ruis və Mikel Lopes İspaniyanın U-15 millisinin heyətində dünya çempionatına qatılıb. Madrid təmsilçisi futbolçularının Bakıdakı oyun təqvimini də öz saytında yayımlayıb.
"Barselona"nın akademiyasından da üç futbolçu İspaniya yığmasına dəvət alıb. Onların milli komandaya qoşulması səbəbindən klubun müvafiq yaş qrupundakı heyəti "Damm A" ilə qarşılaşmada həmin oyunçuların xidmətindən yararlana bilməyəcək.
İngiltərə Premyer Liqasında çıxış edən "Nottingem Forest" isə iki yetirməsinin dünya çempionatında iştirakını rəsmən açıqlayıb. Azae Bonnick İngiltərənin, Eduardo Qaspar isə Kabo-Verdenin U-15 millisinin heyətində Bakıya gəlib.
Türkiyənin üç böyük klubu da yarışda təmsil olunur. Türkiyə Futbol Federasiyasının açıqladığı heyətdə "Fənərbağça"nın üç, "Qalatasaray" və "Beşiktaş"ın isə hərəsinin iki akademiya futbolçusu yer alıb.
Beləliklə, Avropanın tanınmış klublarının yetirmələri Bakıda müxtəlif ölkələrin gənc istedadları ilə üz-üzə gələcəklər.
Bakı Avropa klubları üçün yeni istedad axtarışı məkanına çevrilə bilər
Dünya çempionatının ən maraqlı tərəflərindən biri futbol ənənələri və inkişaf imkanları bir-birindən ciddi fərqlənən ölkələrin eyni yarışda iştirakıdır.
Braziliya, İspaniya, İngiltərə, Portuqaliya və İtaliya kimi ölkələrin gənc futbolçuları Afrika, Asiya, Okeaniya və digər regionların təmsilçiləri ilə qarşılaşacaqlar.
Bu isə peşəkar skautinq sisteminə malik klublar üçün nadir fürsətdir. Avropanın böyük futbol akademiyaları adətən müxtəlif ölkələrdə keçirilən yeniyetmə turnirlərini, milli komandaların oyunlarını və yerli çempionatları izləyərək perspektivli futbolçular haqqında məlumat toplayırlar.
Bakıda isə dünyanın müxtəlif bölgələrindən təxminən 2650 gənc futbolçu bir araya gəlib.
Bu baxımdan İngiltərənin "Çelsi", "Mançester Siti", "Arsenal" və "Liverpul", İspaniyanın "Real Madrid", "Barselona" və "Atletiko", Niderlandın isə "Ayaks", PSV və "Feyenord" kimi klublarının seleksiya strukturlarının turnirlə maraqlanması məntiqli görünür.
Həmin klubların skautlarının birbaşa Bakıya göndərildiyi barədə hələlik təsdiqlənmiş məlumat yoxdur. Bununla belə, onların oyunları videoçəkilişlər, analitik hesabatlar və digər müşahidə vasitələri ilə izləməsi real ehtimal kimi qiymətləndirilə bilər.
Xüsusilə "Ayaks", PSV və "Feyenoord" kimi klubların gənc futbolçuların hazırlanmasına və inkişaf potensialının erkən müəyyənləşdirilməsinə əsaslanan sistemi nəzərə alındıqda, Bakı turniri bu istiqamətdə diqqətçəkən platforma sayıla bilər.
Skautların qarşısında həm fürsət, həm də çətinlik var
Tribuna.com-un dünya çempionatının formatına həsr etdiyi geniş təhlildə də turnirin istedad axtarışı baxımından əhəmiyyəti xüsusi vurğulanır.
Yarışın miqyası skautlar üçün böyük imkanlar açsa da, bütün futbolçuları canlı izləmək asan olmayacaq. Altı oyun günündə 945 qarşılaşma keçiriləcək, bəzi vaxtlarda isə 20 meydançada eyni anda oyunlar baş tutacaq.
Bu səbəbdən qarşılaşmaların videoyazıları, futbolçuların fərdi göstəriciləri və oyunların sonradan təhlili xüsusi əhəmiyyət daşıya bilər.
Turnirin formatı da ənənəvi futboldan fərqlənir. Qarşılaşmalar səkkiznəfərlik komandalar arasında keçirilir və hər biri 20 dəqiqə olmaqla iki hissədən ibarətdir.
Meydançanın daha kiçik olması futbolçuların topla daha çox təmasda olmasına, tez qərar verməsinə və rəqib təzyiqi altında texniki bacarıqlarını nümayiş etdirməsinə şərait yaradır.
Lakin belə formatda fərqlənən yeniyetmənin gələcəkdə 11 nəfərlik klassik futbolda da eyni səviyyədə çıxış edəcəyinə zəmanət yoxdur. Buna görə də skautlar yalnız qısa müddətli nəticələri deyil, futbolçuların texniki hazırlığını, oyun düşüncəsini və uzunmüddətli inkişaf imkanlarını qiymətləndirməli olacaqlar.
Gənc istedadlar üçün böyük fürsət
FIFA-nın Qlobal Futbol İnkişafı Departamentinin rəhbəri Arsen Venger turnirin əsas məqsədini gənc futbolçulara daha çox beynəlxalq oyun təcrübəsi qazandırmaqla əlaqələndirib.
Onun fikrincə, istedadlar dünyanın hər yerində mövcuddur, lakin həmin istedadların üzə çıxması və inkişafı üçün imkanlar bütün ölkələrdə eyni deyil.
Bakıdakı dünya çempionatı məhz bu fərqin azaldılmasına xidmət edir. Kiçik futbol ölkələrinin yeniyetmələri ilk dəfə dünyanın güclü akademiyalarında yetişən həmyaşıdları ilə qarşılaşmaq imkanı əldə edirlər.
Belə turnirlərdə diqqət çəkən futbolçuların dərhal Avropa klublarına transferi isə mümkün olmaya bilər. FIFA-nın qaydalarına əsasən, 18 yaşına çatmayan futbolçuların beynəlxalq transferinə yalnız müəyyən istisna hallarda icazə verilir.
Bu səbəbdən Bakıda özünü göstərən istedadların gələcəkdə böyük klubların uzunmüddətli müşahidə siyahısına düşməsi daha real perspektivdir.
Beləliklə, FIFA-nın ilk U-15 dünya çempionatı Azərbaycan üçün təkcə böyük beynəlxalq idman tədbiri deyil, həm də gələcəyin futbol ulduzlarının üzə çıxa biləcəyi mühüm meydan ola bilər. Yarışın Avropa klublarının skautinq sistemində hansı iz buraxacağı isə turnirdən sonra daha aydın görünəcək.
