Ayxan Abbasov: “Kamal kapitan kimi danışmalı idi”

"Bu oyun klub olaraq bizim üçün vacib idi. Futbolçuların psixoloji gərginlikdən çıxması, birliyimiz üçün önəmli matç idi".

İdman.biz xəbər verir ki, "Turan Tovuz"un baş məşqçisi Ayxan Abbasov deyib.

Gənc mütəxəssis Azərbaycan Premyer Liqasının XXXIV turunda "Araz-Naxçıvan" üzərindəki qələbəni şərh edib: "Rəhbərliyə təşəkkür edirəm, komandanın arxasında oldular. Turnir cədvəli baxımından həm bizim üçün, həm də rəqib üçün rahat oyun idi. Oyuna nəzarət edirdik. Amma rəqibin təhlükəli əks-hücumları oldu. Birinci hissədə rəqibin cərimə meydançasında qərarlarımız düzgün olmadı. İkinci yarımda isə yaxşı hücumlarımız oldu. Yolumuza davam edəcəyik. İki oyunumuz qalıb. Daha sonra növbəti mövsümü fikirləşəcəyik.

Ayxan Abbasov komandanın qapıçısı Kamal Bayramovun qalmaqallı açıqlamalarına aydınlıq gətirib: "Kamal kapitan kimi danışmalı idi. Onun danışmağında heç bir qəbahət yoxdur. Amma özünə də demişəm ki, bəzi mövzulardan uzaq olmaq lazım idi. Həmin mövzular qıcıq yaradır. Köhnə illərin söhbətlərinə qayıtmaq bu gün bizim mövzumuz deyil. Premyer Liqada möhkəmlənmək, özümüzə uyğun oyun stili formalaşdırmağa çalışırıq. Bəzən alınır, bəzən alınmır. Alınmayanda basqılar olacaq. Kamalın bir az diqqətli danışmağı daha yaxşı olardı. Tövsiyələrimizi vermişik. Kamal özü də başa düşür".

Qeyd edək ki, "Turan Tovuz" 45 xalla 6-cı pillədə qərarlaşıb.

İdman.biz