Idman.biz
Əfsanəvi "Formula-1" konstruktoru Edrian Nyui, "Aston Martin"də keçirdiyi dövr haqqında sənədli filmdə rol almağa razılıq verib.
İdman.Biz bildirir ki, filmin prodüserləri Hollivud aktyoru Ben Afflek və üçqat dünya çempionu Ceki Stüartın oğlu Mark Stüart olacaq.
Bu ilin mart ayında "Aston Martin"ə texniki tərəfdaş kimi qoşulan Edrian Nyui, şərti olaraq "Turbulence: The Greatest Mind in Formula 1" adlanan sənədli layihədə baş qəhrəman olacaq.
"Mark Stüart sənədli film çəkmək üçün mənə müraciət edəndə çox sevindim, amma əvvəlcə qəbul edib-etməyəcəyimə əmin deyildim. Lakin, 2017-ci ildə avtobioqrafiyamın nəşrindən sonra kitabdan irəli gələn yarış avtomobili dizaynı və mühəndisliyinə maraq göstərən insanlardan çoxsaylı elektron poçtlar aldım. Ümid edirəm ki, bu film "Formula-1" avtomobili yaratmaq üçün tələb olunan ehtirası, iş axınını və zehni gücü əks etdirəcək", - "Racing News 365" Nyuidən sitat gətirir.
Britaniyalı həmçinin qeyd edib ki, film 2026-cı ildə "Formula-1" qaydalarında əsaslı dəyişikliklərdən əvvəl yeni komandaya keçdikdən sonra üzləşdiyi çətinlikləri araşdıracaq.
"Bu, misli görünməmiş karyerası ambisiya və daimi yenidənqurma ilə dolu olan canlı əfsanənin hekayəsidir. Layihələrimizdə nümayiş etdirmək istədiyimiz bu dərin insani keyfiyyətlərdir", - deyə öz şirkəti "Artists Equity" vasitəsilə prodüserlik edən Ben Afflek bildirib.
