Vikinq – Sabah: Azərbaycan və Norveç klublarının Avrokubokdakı 9‑cu qarşılaşması

"Vikinq" və "Sabah" arasında UEFA Çempionlar Liqasının əsas mərhələsinin IV turunun oyunu Azərbaycan və Norveç təmsilçilərinin avrokuboklarda 9-cu matçı olacaq.

"Report"un məlumatına görə, iki ölkə klubları indiyədək təsnifat və qrup (əsas) mərhələsində rəqib olublar.

Birinci qarşılaşma 2009-cu ilə təsadüf edib. UEFA Avropa Liqasının II təsnifat mərhələsinin ilk matçında səfərdə "Rusenborq"la qolsuz heç-heçə edən "Qarabağ" Bakıda rəqibini minimal hesabla üstələyib - 1:0.

Daha sonra "İnter" (hazırkı "Şamaxı") "Tromse" ilə üz-üzə gəlib. Komandalar 2013/2014 mövsümündə Avropa Liqasının II təsnifat mərhələsində görüşüblər. Səfərdə rəqibinə iki cavabsız qollla uduzan təmsilçimiz Bakıda qələbə (1:0) qazansa da, avrokuboklarla vidalaşıb.

"Qarabağ" 12 ildən sonra yenidən Norveç klubu ilə qarşılaşıb. "Köhlən atlar" UEFA Çempionlar Liqasının III təsnifat mərhələsində "Molde"yə 0:0 hesabı ilə bitən görüşün penaltilər seriyasında yenilib - 5:6. Cütün taleyi koronavirus pandemiyası səbəbindən bir oyunda müəyyənləşib və qarşılaşma UEFA-nın qərarına əsasən Kiprdə təşkil olunub.

Ağdamlılar 2023/2024 mövsümündə Avropa Liqasının qrup mərhələsində də "Molde" ilə görüşüb. Bakıda qalib gələn (1:0) "köhlən atlar" səfərdəki oyunda heç-heçəyə razılaşıb - 2:2.

Son olaraq "Qarabağ" 2024/2025 mövsümündə UEFA Avropa Liqasının Liqa mərhələsində "Budyo Qlimt"lə qarşılaşıb. Norveçdə baş tutan görüşdə Azərbaycan təmsilçisi sevinən tərəf olub - 2:1.

Beləliklə, indiyədək keçirilmiş 8 oyunun 2-də Norveç, 4-də Azərbaycan komandası qalib gəlib, 2 görüşdə isə heç-heçə qeydə alınıb.

Xatırladaq ki, "Vikinq" - "Sabah" oyunu bu gecə, Bakı vaxtı ilə saat 00:00-da start götürəcək.