Report.az
Futzal üzrə Azərbaycan Yüksək Liqasının qalibi olan "Araz-Naxçıvan"ın məqsədi mövsümü iki kubokla başa vurmaqdır.
Bunu "Report"a açıqlamasında komandanın qapıçısı Rövşən Hüseynli deyib.
35 yaşlı qolkiper ölkə çempionatının həlledici matçında "Neftçi" İK-ə qarşı oyunun ağır keçdiyini deyib:
"İki ay öncəki matçda rəqibə məğlub olduğumuz üçün bu dəfə mütləq qalib gəlməli idik. Bütün hazırlıqlarımız bu yöndə idi. Gözlədiyimizdən də çətin qarşılaşma alındı. Hesabda geriyə düşdük, 0:2 uduzurduq. Lakin öncədən müəyyənləşdirdiyimiz plan üzrə işləməyə davam etdik. Oyuna Emin Kürdov əsas heyətdə başladı, müəyyən müddətdən sonra mən meydana daxil oldum. Qapıçını meydan oyunçusuna dəyişməklə üstünlük yaratmaq istədik və bu, işimizə yaradı. İkinci hissədə isə fərqli "4-lük"lərlə oynadıq, taktikanı dəyişdik. Belə gərgin matçlarda səhvlər qaçılmazdır, istədiyin nəticə üçün risk etməlisən. Yekunda bizə lazım olan qələbəni qazandıq və çempion olduq".
O, Azərbaycan Kubokunun finalında yenidən "Neftçi" İK-ə qarşı keçiriləcək oyun barədə fikirlərini də bölüşüb:
"Əsas məqsədimiz mövsümü iki kubokla qapatmaqdır. Avrokuboklara vəsiqə baxımından bu oyunun elə bir əhəmiyyəti olmasa da, mövsümü məğlubiyyətlə bitirmək istəmirik. Baş məşqçimiz də bu fikirdədir".
R.Hüseynli növbəti mövsümlə bağlı planlardan danışmağın hələ tez olduğunu vurğulayıb:
"Dünən çempion olmuşuq və hələ ki bunun dadını çıxarmaq istəyirik. Növbəti mövsüm barədə danışmaq çox tezdir. Çünki komandada istər yerli, istərsə də legioner futbolçuların, həmçinin baş məşqçinin müqaviləsinin müddəti başa çatır. Heyətin necə olacağı hələ bilinmir. Hazırda konkret rəsmi təklif olmasa da, xarici klublardan maraqlananlar və müəyyən siqnallar var. Ölkə və klub adı çəkmək istəmirəm. Hazırda harasa getmək və ya komandada qalmaq barədə qəti qərarım yoxdur. Çünki hələ mövsüm və çempionluq atmosferi tam bitməyib".
Qeyd edək ki, ölkə çempionatının son matçında "Araz-Naxçıvan" "Neftçi" İK-i 5:2 hesabı ilə məğlub edib.
