Report.az
"Səbail" klubu öz komandalarını akademiyanın yetirmələri ilə təmin etmək niyyətindədir.
Bunu "Report"a açıqlamasında Bakı təmsilçisinin futbol akademiyasının direktoru Mirbağır İsayev deyib.
Mütəxəssis klubda xeyli işlər görüldüyünü vurğulayıb:
"Daha əvvəl 6 il "Səbail"in akademiyasının rəhbəri kimi fəaliyyət göstərmişdim. "Səbail"in məqsədi Premyer Liqaya vəsiqə qazanmaqdır. Bildiyiniz kimi, bununla bağlı klubda bir sıra işlər görülüb, yeni məşqçilər, futbolçular dəvət olunub. Rəhbərlik sağ olsun, inandılar və məni də dəvət etdilər. Mən də kömək etməyə hazır olduğumu bildirdim".
O, akademiyanın bərpası və komandaların formalaşdırılması prosesi barədə danışıb:
"Əsas komanda Premyer Liqadan düşdükdən sonra sabiq rəhbərlik akademiyanı saxlamadı və uşaqlar müxtəlif klublara getdilər. Yeni rəhbərliklə müzakirələrdən sonra akademiyanın fəaliyyətini bərpa etmək qərarına gəldik. Artıq 9 yaşdan 16 yaşadək komandalar yığılıb və bu mövsüm AFFA-nın bayrağı altında təşkil olunan çempionatlarda iştirak edəcəklər. U-17 və U-19 yaş qruplarını kənardan gətirilən futbolçularla deyil, öz akademiyamızda yetişən uşaqlarla təmin etmək niyyətindəyik".
UEFA-nın Elit Məşq Layihəsinin rəhbəri kimi də fəaliyyət göstərən M.İsayev paralel olaraq işinə davam edəcəyini deyib:
"AFFA-nın baş katibi Cahangir Fərəcullyevlə danışdım. Həm "Səbail"də, həm də AFFA-nın Elit Məşq Layihəsində işimi davam etdirəcəyəm. Dünən cənub bölgəsində idim. Seleksiya prosesi aparırıq. Əsas vəzifəmiz regionlarda klubsuz qalan istedadlı uşaqları üzə çıxarmaqdır. Seleksiya çərçivəsində Qarabağ bölgəsindən 9, Şəmkirdən 6, Gəncədən 5, Cənub zonası üzrə çoxlu potensiallı uşaq seçilib. Əsas məqsədimiz regionlarda futbolçuların itməsinin qarşısını almaq və onları ölkə futboluna qazandırmaqdır".
