Report.az
İspaniyanın "Atletiko" klubunun sabiq yarımmüdafiəçisi Ruben Peres 37 yaşında peşəkar karyerasını başa vurub.
"Report" xəbər verir ki, ispaniyalı futbolçu bu barədə sosial şəbəkə hesabında paylaşım edib.
O, 20 ildən artıq davam edən peşəkar karyerasını bitirmək qərarına gəldiyini bildirib. Təcrübəli yarımüdafiəçi futbol arzusunun doğma şəhərinin "Esiha Balompye" klubunda başladığını, daha sonra "Atletiko" akademiyasından əsas komandaya qədər yüksəldiyini xatırladıb.
Ruben Peres karyerası ərzində formasını geyindiyi klubların hər birinin onun həyatında unudulmaz iz qoyduğunu vurğulayıb.
O, 2011-ci ildə İspaniyanın U-21 millisinin heyətində Avropa çempionu olmasını böyük şərəf adlandırıb. Sabiq futbolçu azarkeşlərə, komanda yoldaşlarına, məşqçilərə və ailəsinə göstərdikləri dəstəyə görə təşəkkür edib.
Qeyd edək ki, Madrid "Atletiko"sunun yetirməsi olan R.Peres peşəkar karyerası ərzində keçirdiyi 528 rəsmi matçda 4 qol və 9 məhsuldar ötürmə ilə yadda qalıb.
