Qonşularımız Almaniyada - TƏQDİMAT

Bu yay bütün Avropanın diqqəti Almaniyaya yönələcək. Qitənin 24 ən güclü millisi sayca 17-ci Avropa çempionatında mübarizə aparacaq. İyunun 14-dən iyulun 14-dək davam edəcək yarış bu həftə start götürəcək.

İdman.biz AVRO-2024-ün iştirakçılarının təqdimatını davam etdirir.

Bu həftə sonuncu - F qrupunun komandalarını nəzərdən keçiririk. Portuqaliyanın favorit, qardaş Türkiyənin iddialı olduğu qrupda Gürcüstan da mübarizə aparacaq.

Pley-offdan Almaniyaya
Seçmə mərhələnin püşkatmasında "Qarabağ"ın qapıçısı Luka Quqeşaşvilinin də formasını geyindiyi Gürcüstan millisinin bəxti gətirməyib. İspaniyanın favorit olduğu qrupda Norveç və Şotlandiya da yer alıb. Kiprin aşkar autsayder olduğu "beşik"də Gürcüstanın hər iki qələbəsi də bu komanda üzərində olub. Şotlandiya və Norveçdən evdə bir xal alan Xviça Kvaratsxeliya və yoldaşları bundan artığına nail ola bilməyib. 8 xalla qrup dördüncüsü olan Villi Sanyolun yetirmələrinin bütün ümidləri pley-offa bağlanıb. Gürcüstan millisi pley-offun C yolunda mübarizə aparıb. Hər iki matçını evdə keçirən komanda yarımfinalda Lüksemburqu 2 cavabsız qolla məğlub edib. Almaniyaya vəsiqənin sahibini tapdığı həlledici görüşdə rəqib Yunanıstan olub. Qolsuz bitən görüşün taleyini penaltilər seriyası həll edib. 4:2 hesablı qələbə qonşularımızı AVRO-2024-ə daşıyıb.

İkinci cəhddən sevinc
Gürcüstan millisi tarixində ilk dəfə böyük turnirin final mərhələsində oynayacaq. İndiyədək dünya və Avropa çempionatlarında bunu bacarmayan yığmanın debütü ümumilikdə 15-ci cəhddən reallaşacaq. 7 dəfə dünya, 8 dəfə qitə çempionatının seçmə mərhələsinə qatılan qonşularımız Millətlər Liqasının pley-offa vəsiqə verdiyi vaxtdan ümidlənib. AVRO-2020-nin pley-offunun finalında – son addımda büdrəyən yığma ikinci cəhdində istəyinə çatıb. Bu dəfə pley-offun hər iki matçı qələbə ilə nəticələnib. Avropa çempionatlarının seçmə mərhələləri isə adətən son iki yerdən birində yekunlaşıb. Yalnız AVRO-1996-da komanda 6 iştirakçı arasında 3-cü olmaqla final mərhələsinə yaxın olub. Mundiallarda da eyni ssenari yaşanıb. Yalnız bir dəfə seçmə mərhələnin üçüncüsü olan yığma digər cəhdlərdə son iki pillədən birində yer alıb.

Gürcüstan millisinin qrupdakı oyunları:
18 iyun. Türkiyə - Gürcüstan
22 iyun. Gürcüstan - Çexiya
26 iyun. Portuqaliya – Gürcüstan

Qeyd edək ki, F qrupunun görüşləri 4 fərqli şəhərdə - Hamburq, Helzenkirhen, Dortmund və Leypsiqdə keçiriləcək.

Vüqar Xeyrullayev
İdman.biz