Report.az
Trek velosipedi üzrə Azərbaycan millisinin üzvü Viktoriya Sidorenko Qazaxıstanda keçirilmiş "Silk Way Series Astana" beynəlxalq turnirində çıxışını dəyərləndirib.
O, "Report"a açıqlamasında yarışda rəqiblərinin çətin olduğunu bildirib.
Velosipedçi layiqli mübarizə aparmağa çalışdığını söyləyib:
"Daha əvvəl Özbəkistanda, son olaraq isə Qazaxıstanda keçirilən trek üzrə "Silk Way Series Astana" beynəlxalq turnirində iştirak etmişəm. Həm Özbəkistan, həm də Qazaxıstanda sprint yarışlarında bürünc medallar qazandım. Rəqiblərimin güclü olmasına baxmayaraq, layiqli mübarizə aparmağa çalışdım. Bundan əlavə, həm qrup, həm də omnium yarışlarında iştirak etdim. Komanda yoldaşlarım da medal qazana biliblər. Azərbaycan Velosiped İdmanı Federasiyasına və Gənclər və İdman Nazirliyinə təşəkkürümü bildirmək istəyirəm. Ümid edirəm ki, növbəti yarışlarda daha yaxşı nəticə göstərib qalibiyyətlərlə qayıdacağıq".
Qeyd edək ki, V.Sidorenko Beynəlxalq Velosipedçilər İttifaqının (UCI) 2-ci kateqoriyalı yarışında 200 metr məsafəyə sprint üzrə mübarizədə bürünc medal qazanıb. Bu nəticə ilə o, hesabına 80 reytinq xalı da əlavə edib.
