Report.az
İlk 6 oyunda uduzmağımızın səbəbləri çoxdur.
Bunu "Report"a açıqlamasında "Neftçi" basketbol klubunun baş məşqçisi Omid Movahed Nejat deyib.
İranlı mütəxəssis "ağ-qaralar"ın cari mövsüm ilk 6 görüşdə məğlub olmasının səbəblərindən danışıb:
"Bildiyiniz kimi, mövsümün startında komandanı mən çalışdırmırdım. Bununla belə, ilk 6 oyunda uduzmağımızın səbəbləri çoxdur. Kollektivə yeni cəlb olunan basketbolçuların düşərgəyə gec qoşulmaqlarını və uyğunlaşma prossesinin uzanmasını buna nümunə göstərə bilərəm. Daha dəqiq desəm, yeni transferlərin gəlişindən sonra son 3 oyunda məğlub olmuşuq. Dediyim kimi, bu da uyğunlaşma ilə bağlıdır. 15 gün ərzində komandaya, heyətə uyğunlaşmaq çox çətindir".
O, paytaxt klubunun qarşısına qoyulan məqsəddən danışıb:
"Qarşımızda pley-offa vəsiqə qazanmaq və daha sonra finala yüsəlmək hədəfi var. Mövsümü qalib kimi başa vurmaq istəyirik. Lakin hər şeyi zaman göstərəcək. İndiki vəziyyətdə yeni transferlər düşünmürük. Əlimizdə olan oyunçularla davam edəcəyik".
Qeyd edək ki, "Neftçi" Azərbaycan Baketbol Liqasının A qrupunda 6 xalla altıncı - sonuncu sırada qərarlaşıb. Komanda bu gün VII turda "Sabah"la üz-üzə gələcək. Qarşılaşma saat 20:00-da başlayacaq.
