Idman.biz
UFC-nin yarımorta çəki dərəcəsində (77 kq-a qədər) çempionu olan rusiyalı İslam Maxaçev UFC turnirinin Dağıstanda keçirilməsinə ümid etdiyini bildirib.
İdman.Biz xəbər verir ki, o, mümkün yarışın məkanı kimi Mahaçqaladakı "Dinamo" stadionunu göstərib.
"Mütləq UFC turnirini Dağıstanda keçirməliyik. Əgər UFC həqiqətən burada turnir təşkil etsə, bunun üçün bizə "Dinamo" stadionu lazımdır. Stadionun tutumu 20 mindən çox tamaşaçıdır, UFC turnirlərinə isə təxminən 30 min azarkeş gəlir. Düşünürəm ki, bu, ideal olardı", – deyə Maxaçev qeyd edib.
Hazırda Maxaçev UFC-də 16 döyüşlük qələbə seriyasına malikdir. Ümumilikdə İslamın hesabında 28 qələbə və bir məğlubiyyət var.
Rusiyalı idmançı son döyüşünü Nyu-Yorkda keçirilən UFC 322 turnirində avstraliyalı Cek Della Maddalena ilə keçirib. Qarşılaşmada UFC-nin yarımorta çəki dərəcəsində çempionluq kəməri uğrunda mübarizə aparılıb. Döyüş hakimlərin yekdil qərarı ilə Maxaçevin qələbəsi ilə başa çatıb.
