Idman.biz
"Final görüşündə əsas səhvim vaxtında düzgün taktiki dəyişiklik etməməyim və həddindən artıq tələsməyim oldu".
Bunu İdman.Biz-ə açıqlamasında ABŞ-nin Las-Veqas şəhərində keçirilən güləş üzrə U23 dünya çempionatında ikinci yeri tutan yunan-Roma güləşçimiz Elmir Əliyev deyib.
Əliyevin sözlərinə görə, finala qədər bütün rəqiblərinə qalib gəlməsi onda özünəinam yaradıb:
"Final görüşünə qədər hər şey planlaşdırdığım kimi gedirdi. Gözlədiyim nəticələri əldə etdim və rəqiblərimə qarşı layiqli mübarizə apardım. Hər üç görüşdə, həmişə olduğu kimi, özümə və qələbə qazanacağıma inanırdım.
Mən gümüş medalla kifayətlənən idmançılardan deyiləm. Məqsədim hər zaman çempion olmaqdır. Bu dəfə də çempionluğa çox yaxın idim və qızıl medal qazanacağıma inanırdım. Ancaq alınmadı".
O, həmin gün Azərbaycanın digər güləşçilərinin uğursuz çıxışlarının ona mənəvi cəhətdən təsir edib-etmədiyini açıqlayıb.
"İstərdim ki, milli komandamızın bütün üzvləri mənim kimi qələbə qazansın və uğurlu çıxış etsinlər. Təəssüf ki, idmanda hər zaman istədiyimiz nəticəni əldə etmək mümkün olmur. Bu dəfə də belə oldu. Mən bütün komanda yoldaşlarımın uğur qazanmasını istəyirəm və hər birinə gələcək yarışlarda qələbələr arzulayıram", - deyə o fikirlərini yekunladırdı.
Qeyd edək ki, Elmir Əliyev U-23 dünya çempionatının finalında Qazaxıstan təmsilçisi Aybek Aytbekova 4:13 hesabı ilə məğlub olaraq gümüş medal qazanıb.
