Idman.biz
İspaniyanın "Real Madrid" futbol klubunun prezidenti Florentino Peres oktyabrın 25-də "Barselona" ilə keçiriləcək "El-Klasiko"da iştirak etməyəcək.
İdman.Biz İspaniyanın "Mundo Deportivo" nəşrinə istinadən xəbər verir ki, iki klubun rəhbərliyi arasında oyundan əvvəl ənənəvi nahar da təşkil olunmayacaq.
Nəşrin məlumatına görə, "Real Madrid" və "Barselona" arasında münasibətlər "Neqreyra işi" ilə bağlı fikir ayrılıqları səbəbindən gərgin olaraq qalır. Madrid klubu 2023-cü ildə bu iş üzrə məhkəmə prosesinə xüsusi ittihamçı qismində qoşulduqdan sonra tərəflər arasındakı münasibətlər daha da pisləşib.
Beləliklə, Florentino Peres ardıcıl üçüncü mövsümdə "Barselona" ilə səfər oyununda iştirak etməyəcək. Klubların rəhbərləri arasında ənənəvi görüşün keçirilməməsi də tərəflər arasındakı münasibətlərin gərginliyini göstərir.
Qeyd edək ki, "Neqreyra işi" "Barselona"nın İspaniya Hakimlər Texniki Komitəsinin keçmiş vitse-prezidenti Xose Mariya Enrikes Neqreyranın şirkətlərinə etdiyi ödənişlərlə bağlı araşdırmadır. "Barselona" bu ödənişlərin hakim qərarlarına təsir göstərmək məqsədi daşıdığını təkzib edib.
