Flik "Real" ilə final oyunu haqqında danışdı

"Barselona"nın baş məşqçisi Hans-Diter Flik İspaniya kubokunun finalında bu gün "Real"a qarşı keçirəcəkləri matç haqda danışıb.

QOL.az "Mundo Deportivo"ya istinadə  xəbər verir ki, mütəxəssis həlledici oyunun çətin keçəcəyini deyib:

"Üç kubok qazanmaq şansımız var və bu, bizim məqsədimizdir. Amma çətin olacağını bilirik. Çünki bizim yolumuzda "Real" dayanır. Bu komanda mükəmməldir. "Barselona" finaldan həzz almalıdır.

Çox gənc komandamız var və bu, əvəzolunmaz təcrübədir. Final həmişə xüsusi matçdır. Belə oyunlarda avorit olmur.

Siz məni tanıyırsınız, təvazökar insanam. Bizim dünyanın ən yaxşı komandası olduğumuzu söyləmək fikrində deyiləm. Gələcəkdə rəqiblərimizi qorxutmaq istəyirik, lakin bu haqda danışmaq hələ tezdir. Ümid edirəm ki, finalda azarkeşlərə sevinmək üçün əsas verə bilərik".

Daha əvvəl "Real"ın son vaxtlar davamlı hakim qərarlarından narazı qalması səbəbindən bu görüşə çıxmayacağı barədə məlumatlar yayılıb. Lakin Madrid təmsilçisi ötən gecə bəyanat yayaraq həmin xəbərləri təkzib edib. Almaniyalı məşqçi bu məsələyə də münasibət bildirib: 

"Hakimlərə nə deyim, bilmirəm... Futbol dmandır, oyundur. Bizim borcumuz bu vəziyyətdə hamını qorumaqdır. Danışmaq düzgün deyil, matçdan sonra hər şeyi arxada qoymaq lazımdır. Emosiyalar olur. Amma biz hakimlərin qayğısına qalmalıyıq. Onlara hörmətsizlik göstərə bilmərik".

Xatırladaq ki, "El-Klassiko" bu gün Bakı vaxtı ilə saat 00:00-da başlayacaq.