Idman.biz
"Barselona"nın baş məşqçisi Hans-Diter Flik La Liqanın onuncu turunda "Real Madrid"lə keçiriləcək El-Klasiko öncəsi rəqibin gücünü yüksək qiymətləndirib və Joze Mourinyo haqqında fikirlərini bölüşüb.
İdman.Biz xəbər verir ki, almaniyalı mütəxəssis mətbuat konfransında Madrid təmsilçisinin xüsusilə hücum xəttində böyük potensiala malik olduğunu vurğulayıb.
"Real Madrid" dünyanın ən yaxşı komandalarından biridir. Bu, güclü futbolçuları və əla məşqçisi olan böyük klubdur. Xüsusilə hücumun son mərhələsində çox keyfiyyətlidirlər. Son oyunlarda da yaxşı nəticələr göstəriblər. Biz buna hazır olmalıyıq", - deyə Flik söyləyib.
Mourinyo barədə sualı cavablandıran baş məşqçi portuqaliyalı həmkarına hörmət etdiyini gizlətməyib:
"Ona böyük hörmətim var. Uzun illər ərzində böyük komandaları çalışdırıb və uğurlar qazanıb. Öz səviyyəsini dəfələrlə sübut edib. O, çox uğurlu məşqçi və dəyərli həmkardır".
Flik El-Klasikonun adi çempionat oyunundan daha böyük əhəmiyyət daşıdığını düşünür:
"Bu, futbolun təqdim edə biləcəyi ən yaxşı qarşılaşmadır. El-Klasiko sadəcə üç xaldan daha böyük məna daşıyır. Düşünürəm ki, komandadakı hər kəs necə oynamaq istədiyimizi bilir. Əsas məsələ də budur. Biz hazırıq və komandama inanıram".
PSJ-yə məğlubiyyəti də xatırladan mütəxəssis həmin oyundan nəticə çıxardıqlarını qeyd edib:
"Qarşılaşmanı təhlil etmişik. Bəzi məqamlarda çox yaxşı oynadıq, amma inkişaf etdirməli olduğumuz tərəflər də var. Komanda olaraq irəliləməyə davam etməliyik. Sabah bunu göstərmək və öz oyun üslubumuzu nümayiş etdirmək üçün yaxşı fürsətdir".
Flik heyətdəki itkilər barədə də danışıb. Onun sözlərinə görə, Dani Olmo zədə səbəbindən meydana çıxa bilməyəcək:
"Olmo çox yaxşı vəziyyətdə idi, tam hazır idi. Təəssüf ki, bəxti gətirmədi. Bununla barışmalıyıq. Onun yoxluğunu hiss edəcəyik".
Baş məşqçi Jül Kundenin də oyunda iştirak etməyəcəyini təsdiqləyərək futbolçunun sağlamlığı ilə bağlı risk etmək istəmədiklərini vurğulayıb.
Gənc futbolçuların çıxışına toxunan Flik Rodrinin komandaya əlavə imkanlar qazandırdığını, Xavi Espartın isə böyük potensiala malik olmasına baxmayaraq, inkişafını davam etdirməli olduğunu söyləyib.
Qeyd edək ki, "Barselona" - "Real Madrid" qarşılaşması bu gün "Spotify Kamp Nou" stadionunda keçiriləcək.
