Idman.biz
Futbol tarixində ilk dəfə təşkil olunacaq FIFA U-15 Dünya Çempionatı və Festivalının iştirakçıları Bakıya gəlməyə başlayıblar.
İdman.Biz AFFA-nın rəsmi saytına istinadən xəbər verir ki, Azərbaycana gələn ilk xarici komanda Nikaraquanın 15 yaşadək futbolçulardan ibarət milli yığması olub.
Mərkəzi Amerika ölkəsinin nümayəndə heyəti oktyabrın 19-da Heydər Əliyev Beynəlxalq Aeroportunda qarşılanıb. Bununla da irimiqyaslı futbol tədbirinin iştirakçılarının qəbulu üzrə təşkilati mərhələyə rəsmən start verilib.
AFFA-nın son məlumatına əsasən, oktyabrın 22-dən 30-dək keçiriləcək FIFA U-15 Dünya Çempionatı və Festivalında 189 ölkənin təmsilçilərinin iştirakı gözlənilir. Turnir çərçivəsində minə yaxın oyunun təşkili nəzərdə tutulub.
Yarış qeyri-adi formatda keçiriləcək. Komandalar meydanda səkkiz nəfərlik heyətlə mübarizə aparacaq, hər qarşılaşma isə 20 dəqiqəlik iki hissədən ibarət olacaq.
Oyunların böyük hissəsi Hövsan qəsəbəsində xüsusi inşa olunmuş idman kompleksində təşkil ediləcək.
Tarixdə ilk dəfə keçirilən FIFA U-15 Dünya Çempionatı və Festivalı Azərbaycanın ev sahibliyi etdiyi ən böyük beynəlxalq futbol tədbirlərindən biri olacaq.
