Idman.biz
Azərbaycanlı UFC döyüşçüsü Fərman Həsənov oktyabrın 31-də Las-Veqasda keçiriləcək "UFC Fight Night" turnirində ABŞ təmsilçisi Jan-Pol Lebosnoyani ilə qarşılaşacaq.
İdman.Biz xəbər verir ki, 31 yaşlı idmançı döyüşə autsayder statusunda çıxmasına münasibət bildirib.
"Favorit və ya autsayder olmağım məni maraqlandırmır. Əsas məsələ qəfəsə çıxmaq və bacardığını göstərməkdir. Bu, məni narahat etmir. Sadəcə döyüşə hazırlaşıram və belə məsələlərə diqqət yetirmirəm", - Həsənov jurnalistlərin suallarını cavablandırarkən deyib.
Döyüşçü rəqibinin populyarlığına münasibət bildirib və bu qarşılaşma vasitəsilə daha çox tanınmaq istəyib-istəmədiyi barədə danışıb.
"Bəli, bu, yaxşı olardı. Amma azarkeşlərin sayına fikir vermirəm. Öz zəhmətimə güvənirəm. UFC mənə güclü rəqib seçib. Ən yaxşı olmaq istəyirsənsə, güclü döyüşçülərə qalib gəlməlisən. Mən çətin sınaqları sevirəm. Rəqibimin ciu-citsu üzrə yaxşı bazası, həmçinin zərbə texnikası var. Amma bu döyüşə hazıram", - o bildirib.
Həsənov qarşılaşmada qələbə qazanacağına əmin olduğunu vurğulayıb.
"Bu döyüşlə bağlı proqnozum həmişəki kimidir: qalib gələcəyəm. Hər şey sadədir: məşq edirəm və hazıram. Yaxşı döyüş və maraqlı şou olacaq", – idmançı qeyd edib.
Azərbaycanlı döyüşçü qarşılaşma üçün strategiyasını açıqlamasa da, rəqibi üzərində müəyyən üstünlüklərinin olduğunu deyib.
Həsənov hazırlıq prosesi barədə də danışıb. Onun sözlərinə görə, məşq toplanışı uğurlu keçib və o, "American Top Team" komandası ilə çalışıb.
"Toplanış əla keçdi. ‘American Top Team" dünyanın ən yaxşı komandasıdır. UFC-nin ən yaxşı yarımorta çəki döyüşçülərindən biri olan Yaroslav Amosovla da hazırlaşmışam. Özümü yaxşı hiss edirəm. Artıq döyüş həftəsidir, bütün işlər görülüb, toplanış başa çatıb, çəkim qaydasındadır. İlk dəfə Las-Veqasda döyüşəcəyəm, baxmayaraq ki, əvvəllər ABŞ-da çıxış etmişəm. Özümü əla hiss edirəm. Las-Veqas gözəl yerdir. Bu şəhəri sevirəm, əvvəllər də burada olmuşam. Burada döyüşmək çox xoş olacaq", – Həsənov bildirib.
Döyüşçü saat fərqinə baxmayaraq, Azərbaycandakı azarkeşlərin onu dəstəkləyəcəyinə inandığını söyləyib.
"Ölkəm məni həmişə dəstəkləyir. Hamı döyüşü izləyəcək. Saat fərqi böyükdür, amma azarkeşlər yenə də qarşılaşmanı izləyəcəklər", – o deyib.
Həsənov UFC-də debütünün Bakıda baş tutduğunu da xatırladıb. O, doğma azarkeşlər önündə çıxış edərkən təzyiq hiss edib-etmədiyi barədə suala belə cavab verib:
"Bu, məni yalnız motivasiya edirdi. Heç bir təzyiq hiss etmirdim. Biz döyüşçülərik və gördüyümüz işdən zövq alırıq".
Sonda idmançı motivasiyasının daim yüksək olduğunu vurğulayıb:
"Mən həmişə motivasiyalı oluram. Səhər yuxudan oyananda belə motivasiyalı oluram. Şənbə gününü səbirsizliklə gözləyirəm".
