Idman.biz
Everestin zirvəsinə qalxan Azərbaycanın ilk qadın alpinisti Vəfa Musayeva Vətənə qayıdıb.
İdman.biz xəbər verir ki, Heydər Əliyev adına Beynəlxalq Hava Limanında onu yaxınları və media nümayəndələri qarşılayıblar.
Vəfa Musayeva bildirib ki, 8 il Everest zirvəsini fəth etmək haqqında düşünüb və son iki ildə bunun üçün çox ciddi hazırlaşıb. Everest zirvəsini fəth etmək isə onun 35 günün alıb. O, zirvəyə çatan ərəfədə yaşadıqlarından və təəssüratlarından da bəhs edib. Vəfa Musayevanın sözlərinə görə, bir az qorxulu an olub, lakin öhdəsindən gəlməyi bacarıb.
Everesti fəth edən alpinist 7900-8000 metr hündürlükdə yerləşən düşərgəyə enib. Bundan sonra ikinci zirvəni də fəth etmək qərarına gəlib. Beləliklə o, 8 516 m hündürlüyə malik Lhotse dağının da zirvəsinə qalxaraq 3 gün ərzində 2-ci dəfə 8000 metrdən artıq yüksəkliyi fəth edib.
Alpinist vurğulayıb ki, bu zirvəni fəth etmək yolunda ailəsi və yaxınları ona dəstək olublar.
İdman.biz
