Idman.biz
Azərbaycanda ilk dəfə təşkil olunan çimərlik polosu üzrə "Sea Breeze 2026" beynəlxalq turnirində mübarizə aparan "Elit polo club" yarımfinala yüksəlib.
İdman.Biz xəbər verir ki, Azərbaycan təmsilçisi Rusiyanın "Moskva" klubunu 7:3 hesabı ilə məğlub edib.
"Sea Breeze Resort" ərazisindəki "Havana Beach"də keçirilən qarşılaşmadan sonra "Elit"in kapitanı Elçin Camallı görüşlə bağlı fikirlərini bölüşüb.
O, matçın gərgin keçdiyini bildirib: "Yaxşı hazırlaşmışdıq və maraqlı oyun alındı. Qum örtüyü bir qədər dərin idi. Ümid edirəm ki, sabahkı görüşdə qələbə qazanaraq finala yüksələrik".
Camallı qum örtüyünün oyun zamanı atların fiziki durumuna da təsir etdiyini söyləyib. Onun sözlərinə görə, əvvəlcə qumun bərk olması sürətli oyun gözləntisi yaradıb, lakin qarşılaşma davam etdikcə örtük dərinləşib.
"Normalda at altı dəqiqədən sonra yorulursa, burada təxminən üç dəqiqədən sonra yorulurdu. Buna görə də atları üç dəqiqədən bir dəyişirdik ki, onların zədələnməsinin qarşısını alaq və daha gümrah qalsınlar", – deyə kapitan qeyd edib.
Azərbaycan təmsilçisinin yarımfinaldakı rəqibi Böyük Britaniyanın "Red Star" komandası olacaq. Camallı rəqibin oyununu izlədiklərini və qarşılaşmanın çətin keçəcəyini bildirib:
"Onların oyununu izlədik. Görüşləri əlavə dəqiqələrə qədər uzandı və çox gərgin mübarizə şəraitində keçdi. Yarımfinalda atmosfer tamamilə fərqli olur. İnşallah, azarkeşlər üçün maraqlı qarşılaşma alınar, biz də yaxşı oyun nümayiş etdirərək qələbə qazanarıq".
Qeyd edək ki, turnirin rəsmi təşkilatçıları Azərbaycan Respublikası Atçılıq Federasiyası (ARAF) və "Sea Breeze"dir. Yarışda Azərbaycan, Böyük Britaniya, İsveçrə və Rusiyanı təmsil edən 4 komanda iştirak edir.
Günün digər matçında Böyük Britaniyanın "Red Star" və İsveçrənin "Sankt Mortiz" komandaları qarşılaşıb. İsveçrə təmsilçisi 7:6 hesabı ilə qalib gəlib.
Sabah keçiriləcək yarımfinal görüşündə "Elit" Böyük Britaniyanın "Red Star" klubu ilə üz-üzə gələcək. Digər yarımfinalda isə "Sankt Mortiz" (İsveçrə) "Moscow polo club" (Rusiya) ilə qarşılaşacaq. Qalib komandalar sentyabrın 13-də finalda, məğlublar isə üçüncü yer uğrunda matçda mübarizə aparacaqlar.
