Idman.biz
Bakı mötəbər "Alufar IRONMAN 70.3" triatlon yarışına hazırlaşır.
İdman.Biz xəbər verir ki, sentyabrın 5-də paytaxtımızda keçiriləcək yarışa 62 ölkədən 1500-dən çox iştirakçının qatılacağı gözlənilir.
Azərbaycan yarışda 123 idmançı ilə təmsil olunacaq.
"IRONMAN 70.3" yarışı kişilər və qadınlar arasında 13 yaş kateqoriyası üzrə keçiriləcək. Yarış 18–24, 25–29, 30–34, 35–39, 40–44, 45–49, 50–54, 55–59, 60–64, 65–69, 70–74, 75–79 və 80–84 yaş qruplarını əhatə edir. Ümumi iştirakçıların 807-si kişi, 197-si qadındır. Yarışın ən gənc iştirakçısının 18, ən yaşlı iştirakçısının isə 80 yaşı var.
"Alufar IRONMAN 70.3" çərçivəsində estafet yarışı da keçiriləcək. Kişilər, qadınlar və qarışıq komandalar arasında təşkil olunacaq yarışda ümumilikdə 47 komanda mübarizə aparacaq. Yarışın yekunlarına əsasən ən aktiv üç klub da mükafatlandırılacaq.
Xatırladaq ki, "IRONMAN 70.3" yarışında iştirakçılar 1,9 kilometr üzgüçülük, 90 kilometr velosiped və 21,1 kilometr qaçış mərhələlərini qət edəcəklər.
"IRONMAN 70.3 Baku" yarışında kişi və qadınlar arasında ən yaxşı nəticə göstərən 25 idmançı 2027-ci ildə ABŞ-da keçiriləcək "IRONMAN 70.3" Triatlon üzrə Dünya Çempionatına vəsiqə qazanacaq.
"Alufar IRONMAN 70.3 Baku" tədbiri çərçivəsində sentyabrın 4-də uşaqlar üçün "IRONKIDS", eləcə də "Fun Run" qaçışları keçiriləcək. "IRONKIDS" yarışında 5–8 yaşlı uşaqlar 500 metr, 9–13 yaşlı iştirakçılar 1 kilometr, 14–17 yaşlı iştirakçılar isə 2 kilometr məsafə qət edəcəklər. 5 kilometrlik "Fun Run" qaçışında isə 18 yaşdan yuxarı şəxslər iştirak edə bilərlər. Hər iki yarışa qeydiyyat hazırda davam edir.
Qeyd edək ki, yarışlar Azərbaycan Respublikasının Gənclər və İdman Nazirliyi, Azərbaycan Triatlon Federasiyası və Bakı Şəhər Halqası Əməliyyat Şirkətinin təşkilatçılığı ilə baş tutacaq.
