Idman.biz
Velosiped idmanı üzrə müxtəlif yaş qruplarından ibarət milli yığma komandalarımızın Gədəbəydə keçirilən təlim-məşq toplanışı başa çatıb.
İdman.biz xəbər verir ki, Dəniz səviyyəsindən 1500-1700 metr yüksəklikdə keçirilən toplanış zamanı idmançılarımız nəzəri-praktiki məşqlərdə və təlimlərdə öz peşəkarlıq səviyyələrini yüksəldiblər.
Təlim-məşq toplanışının yekunları ilə bağlı keçirilən tədbirdə Azərbaycan Velosiped İdmanı Federasiyasının 1-ci vitse-prezidenti Sahib Ələkbərov bildirib ki, AzVİF rəhbərliyi yığma komandaların üzvlərinin hazırlığının artırılmasına xüsusi diqqət yetirir. Gədəbəy rayonunun təbiəti və coğrafi şəraiti isə velosipedçilərin müxtəlif növ marşrutlarda məşq etmələrinə imkan yaradıb. Xüsusilə, yüksəklikdə yerləşən marşrutlar idmançıların fiziki hazırlığına müsbət təsir göstərib ki, bu da yığma üzvlərimizin sentyabrda Ruandada keçiriləcək dünya çempionatına və oktyabrda Fransada təşkil olunacaq Avropa çempionatına hazırlığı üçün olduqca önəmlidir.
Tədbir zamanı təlim-məşq toplanışının gedişini əks etdirən videoçarx nümayiş olunub, rəhbər, tibbi və texniki heyətin hesabatları dinlənilib, ortaya çıxan suallarla bağlı gələcəkdə keçiriləcək təlim-məşq toplanışlarında nəzərə alınmalı məsələlərlə əlaqədar müvafiq tapşırıqlar verilib.
İdman.biz
