Airbadminton üzrə Avropa çempionatı: Azərbaycan millisi gümüş medal qazandı

"Azərbaycanın airbadminton komandasının böyük potensialı var".

İdman.biz xəbər verir ki, bunu "Report"a açıqlamasında millinin baş məşqçisi Morteza Validarvi deyib.

O, Azərbaycanda keçirilən airbadminton üzrə Avropa çempionatında komandasının nəticələrini dəyərləndirib: "Yarış yüksək səviyyədə keçdi. Təəssüf ki, finalda Almaniyaya uduzduq. İlk dəfə gümüş medal qazandıq. Azərbaycan bayrağını dalğalandırmaq bizim üçün fəxr idi. Göstərdik ki, yüksək potensialımız var. Airbadminton fərqli yarışdır. Badmintonda yığmaya düşmək şansı olmayanlar airbadmintona gəlir. Bu, onlar üçün bir fürsətdir. Yəni bir növ futbola bənzəyir. Böyük futbolda şans qazanmayıb futzala keçən oyunçular kimi. Düşünürəm ki, Azərbaycan dünya çempionatında da medal qazana bilər".

O, Azərbaycanda təşkilatçılığın yüksək qiymətləndirildiyini vurğulayıb: "Dünya Badminton Federasiyasından məşqçi kimi mənə təşəkkür etdilər. Yüksək səviyyəli idmançılar hazırladığımı bildirdilər. İki il əvvəl bu yarışda 5 komanda iştirak etmişdi və biz dördüncü olmuşduq. Bu dəfə yeni və daha peşəkar komandalar əlavə olunmuşdu. Bu yarış beş qitədə keçirilib. Azərbaycanı yüksək qiymətləndirdilər".

Qeyd edək ki, Azərbaycan millisi Avropa Oyunları Parkında keçirilən airbadminton üzrə Avropa çempionatının final matçında Almaniyaya məğlub olaraq ikinci yeri tutub.

İdman.biz