Idman.biz
Avropa çempionu və dünya mükafatçısı Orxan Səfərovun rəhbərlik etdiyi "Safarov Judo Academy" ölkə cüdosunda özünəməxsus yer tutur. Bu günlərdə paytaxtda ikinci zalın açılması layihənin genişləndiyini göstərir.
Akademiyanın qurucusu - Avropa çempionu, dünya çempionatlarının ikiqat mükafatçısı, iki Olimpiadanın iştirakçısı Orxan Səfərov öz övladı saydığı bu layihə barədə İdman.Biz-ə danışıb və perspektiv planlarını bölüşüb.
– Orxan Səfərovun qurduğu Akademiyanın ikinci zalının açılmasını nəzərə alsaq, demək olarmı ki, işlər yüksələn xətt üzrə gedir?
– Mənim fikrimcə, Akademiya düzgün istiqamətdə inkişaf edir. 8-ci kilometr qəsəbəsi ərazisində ikinci zalın açılması hələ sözün tam mənasında uğur deyil. Bu, sadəcə, daha böyük məsuliyyət və nəzarət tələb edən bir mərhələdir. Bu baxımdan, ən çətin dövr hələ indi başlayır.
– Akademiya ikinci ildir fəaliyyət göstərir. İnkişafdan razısınızmı?
– Qismən razıyam, qismən yox. Sabit məşq sisteminin qurulmasına, qrupların formalaşdırılmasına, məşğul olanlar arasında intizamın və cüdo mədəniyyətinin yaradılmasına nail olunması xoşuma gəlir. Bəzən bəzi idmançıların inkişaf tempindən narazı qalıram. Amma anlayıram ki, vaxt lazımdır, hər şey birdən-birə olmur.
– Bir vaxtlar qeyd edirdiniz ki, işinizdə Avropa hazırlıq metodikasını yapon yanaşması ilə uzlaşdırmağa çalışırsınız. Bu nə dərəcədə uğurludur?
– Yapon yanaşması baza verir. Bu, duruş, məsafə, balans, tayminq, detallara hörmətdir. Amma indi getdikcə daha aydın anlayıram ki, biz özümüzün, azərbaycanlı modelini formalaşdırmalıyıq. Çünki bizim idmançılarda sırf yapon məktəbində olmayan bacarıqlar var – emosionallıq, döyüşkən ruh. Mənim üçün vacibdir ki, şagirdlərim vuruşsunlar, gözlərində alov olsun və görüşlərə sadəcə texnikanı icra etmək üçün yox, real olaraq qələbə uğrunda döyüşmək üçün çıxsınlar.
– Şagirdlərinizin beynəlxalq turnirlərdə iştirakı nəzərdə tutulurmu?
– Açığı, mən turistik səfərlərin əleyhinəyəm. Əvvəl daxili rəqabət, milli startlar, formanın sabitliyi olmalıdır. Yalnız bundan sonra xarici səfərlər mümkündür. Əgər idmançı buna hazırdırsa, əlbəttə ki, erkən yaşlarda beynəlxalq təcrübə vacibdir. Əks halda, bu, pulun və vaxtın boşa xərclənməsidir.
– Bu il dünya çempionatı Bakıda keçiriləcək. Sizcə, Azərbaycan millisinin nə gözləyir, hansı nəticəyə ümid etmək olar?
– Komandamızın medal qazanmaq potensialı hər zaman var. Ev çempionatı bəzən düşünüldüyü kimi üstünlük deyil, əksinə, əlavə təzyiqdir. Medallar olacaq, amma onların sayını əvvəlcədən demək çətindir.
– Müxtəlif beynəlxalq seminar və proqramlarda iştirak baxımından planlarınız nədən ibarətdir?
– Beynəlxalq seminar və təhsil proqramlarında daha fəal iştirak etməyi planlaşdırıram. Formal xatirinə yox, metodikanı daim yeniləmək və peşəkar əlaqələri genişləndirmək üçün. Hesab edirəm ki, müasir məşqçi yalnız öz təcrübəsi ilə kifayətlənməməlidir.
