İdman.biz
Düşənbədə (Tacikistan) gənclər arasında cüdo üzrə dünya çempionatı davam edir.
İdman.biz xəbər verir ki, yarışın üçüncü günündə Azərbaycanın 3 idmançısı mübarizəyə qoşulub.
81 kq
Süleyman Şükürov çıxışına ikinci mərhələdən başlayıb və Mixaylo Siminə (Serbiya) qalib gəlib. Daha sonra o, Senq-Min Kimi (Koreya) məğlub edərək 1/4 finala yüksəlib. O, növbəti dəfə Coşua Delanq (Niderland) ilə üz-üzə gələcək.
90 kq
Aslan Kotsoyev yarışa Amir Çopan (İran) üzərində qələbə ilə başlayıb, daha sonra Şahzod Şaripov (Özbəkistan) və Markos Martinez Koini (İspaniya) məğlub edərək 1/4 finala çıxıb. Bu mərhələdə onu Komei Kivabata (Yaponiya) gözləyir.
Tuncay Şamil ikinci mərhələdən mübarizəyə başlayıb və Yeqor Malkinə (IJF) məğlub olub.
Qeyd edək ki, dünya çempionatının iki günündən sonra Azərbaycan yığmasının hesabında medal yoxdur. Nizami İmranov (60 kq) və Aydan Vəliyeva (52 kq) bürünc uğrunda görüşlərdə məğlub olublar.
İdman.biz
