"Qəbələ"nin futbolçusu Şahin Şahniyarov Gəncədə doğulsa da, 12 yaşından “Qəbələ” Futbol Akademiyasında məşq edir.
22 yaşlı yarımmüdafiəçi "Şəfa"nı səfərdə 2:0 hesabı ilə məğlub etdikləri Misli Premyer Liqasının XII tur matçından sonra Sportify.az-a açıqlamasında doğma şəhərinin komandası "Kəpəz"in oyunlarını izlədiyini bildirib.
Gənc futbolçu hazırda "Qəbələ"nin formasını geyindiyi üçün "Kəpəz" barədə danışmağın düzgün olmayacağını söyləyib. Bununla belə, o, Gəncədəki futbol atmosferindən xüsusi zövq aldığını vurğulayıb: "Azərbaycan Premyer Liqasının bütün matçlarını izləyirəm. "Kəpəz" də mənim doğma şəhərimin komandasıdır. Amma hazırda "Qəbələ"də oynadığım üçün "Kəpəz"lə bağlı danışmağım düzgün olmaz. Bu kollektivə qarşı Gəncə Stadionunda çıxış etmişəm. Həmin matçda 0:1 hesabı ilə məğlub olmuşduq”.
Şahniyarov “Kəpəz” – “Qarabağ” qarşılaşması barədə də danışıb: “Bilirəm ki, azarkeşlər stadionu tam dolduracaqlar. Mən də istirahət vaxtı Gəncədə olanda "Kəpəz"in oyunlarını stadiondan izləyirəm. Həqiqətən, atmosfer çox xoşuma gəlir. Lakin “Qarabağ”la görüşdə stadionda olmayacağam. Çünki biletlərin hamısı artıq satılıb (gülür – red.)”.
Qeyd edək ki, noyabrın 25-də Gəncə Stadionunda keçiriləcək Misli Premyer Liqasının XII turunun “Kəpəz” – “Qarabağ” matçı saat 17:00-da başlanacaq.
Посмотреть эту публикацию в Instagram