Azərbaycan idmanı tarixində yeni rekord qeydə alınıb.
İdman.biz xəbər verir ki, bu nailiyyətə Mariya Stadnik imza atıb.
Qadın güləşi üzrə Azərbaycan millisinin lideri 5-ci dəfə Olimpiadaya lisenziya qazanan ilk idmançı kimi ölkəmizin tarixinə düşüb. O, buna İstanbulda keçirilən Dünya Olimpiya Təsnifat Turnirində nail olub.
Stadnik Paris-2024 Yay Olimpiya Oyunlarında iştirak hüququnu qardaş Türkiyədə əldə edib. Fransa paytaxtındakı yarış onun karyerasında ardıcıl 5-ci Olimpiada olacaq.
Mariya Parisə qədər 4 belə yarışa qatılıb. O, əvvəlki şanslarının hamısında medal əldə edib.
Güləşçimiz Pekin-2008 və Tokio-2020-də bürünc medal qazanıb. İdmançımız London-2012 və Rio-2016-da yalnız finalda uduzaraq gümüşlə kifayətlənib.
Olimpiadalarda ən çox medal qazanan Azərbaycan idmançısı artıq iştirak sayında da mütləq rekordçudur. O, 4 dəfə Oyunlarda iştirak edən İradə Aşumovanı geridə qoyub. Güllə atıcımız Atlanta-1996, Afina-2004, Pekin-2008 və London-2012-yə qatılıb. Snayperimiz bu yarışlarda bir bürünc əldə edib.
Qeyd edək ki, Mariya Paris-2024-ə Tokio-2020-də də çıxış etdiyi 50 kq çəkidə lisenziya qazanıb. O, ilk üç Olimpiadasında 48 kq çəkidə mübarizə aparıb.
Vüqar Xeyrullayev
İdman.biz