Vitali Borisov Azərbaycan millisindən ayrılma səbəbini açıqladı: Məqsədə çata bilmədik

Azərbaycan futzal millisinin sabiq baş məşqçisi Vitali Borisov postundan ayrılmasına münasibət bildirib.

İdman.biz xəbər verir ki, mütəxəssis bu barədə "Report"a açıqlama verib.

O, qarşıya qoyulan məqsədə çata bilmədikləri üçün millidən ayrıldığını söyləyib: "Müqavilə imzalayanda qarşıma Avropa çempionatının seçmə mərhələsində qrupdan çıxmaq məqsədi qoymuşdular. Ancaq hədəfə çata bilmədik. Bu səbəbdən müqavilə yenilənmədi".

O, tələbə futzalçılar arasında keçiriləcək Avropa çempionatına hazırlaşdıqlarını deyib: "Tələbə futzalçılar arasında Xorvatiyada keçiriləcək Avropa çempionatına hazırlaşırıq. Hələ ki, başqa klublardan təkliflər yoxdur. Bu vaxtlar komandalar istirahətdə olurlar. Yəqin ki, çempionat oktyabrda başlayacaq. Hələ ki, müəyyən vaxt var".

V.Borisov millinin yeni baş məşqçisi Yevgeni Kukseviçin təyinatı ilə bağlı fikirlərini də bölüşüb: "Onu yaxından tanımasam da, zaman-zaman görüşümüz olub. Yeni baş məşqçiyə uğurlar arzulayıram. Ümid edirəm ki, millini yüksək pillələrə qaldıracaq. Nələr olacağını zaman göstərəcək. "Araz-Naxçıvan"da cəmi üç aydır işləyir. Düzdür, komandada ciddi dəyişikliklər görməmişəm, amma baş məşqçinin rəhbərliyi ilə ötən mövsüm çempion oldular. Bu münasibətlə təbrik edirəm. Yenidən millini yüksək pillələrə qardırarsa, buna şad olarıq".

Qeyd edək ki, Vitali Borisov bir müddət əvvəl Azərbaycan millisinin baş məşqçi postundan ayrılıb. Onu "Araz-Naxçıvan" klubuna da rəhbərlik edən rusiyalı mütəxəssis Yevgeni Kukseviç əvəzləyib.

İdman.biz