Idman.biz
Mavritaniya Minifutbol Federasiyasının prezidenti Yakub Douanın AZƏRTAC-a müsahibəsi
- Bakının ilk dəfə ev sahibliyi etdiyi mundialın təşkilatçılığı barədə nə deyə bilərsiniz?
- Bilirdim ki, Azərbaycan bu yarışa ciddi hazırlaşacaq. Çünki ölkənizin yığması da turnirin qalibi olmağa iddialı komandalardan biridir. Mən Qətərdə keçirilən futbol üzrə dünya çempionatını canlı izləmişdim. Bakıya gəldikdən sonra gördüm ki, həmin mundialın mini versiyası Azərbaycanda təşkil edilib. Oxşarlıq hiss etdim. Gözləntilərimdən də yaxşı səviyyədə təşkilatçılıq var. Hər şey idealdır.
- Turnirin keçirildiyi Milli Gimnastika Arenası haqqında fikirləriniz maraqlıdır...
- Burada idmançılar üçün gözəl şərait yaradılıb. Mən heyran qaldım.
- Mavritaniya millisi qrupun sonuncu oyununda Azərbaycana 0:2 hesabı ilə məğlub oldu. Həmin matçı necə şərh edərdiniz?
- Biz qrupun digər komandaları olan Bəhreyn və Sloveniya yığmaları arasında oyunun nəticəsinə əsasən Azərbaycanla matça rahat çıxa bilərdik. Lakin Bəhreynin qalib gəlməsi bizim də işimizi çətinləşdirdi. Buna görə də meydana qələbə üçün çıxmışdıq. Müdafiəyə daha çox diqqət yetirdik. Biz isə topu daha çox özümüzdə saxlamağı sevən komandayıq. Təəssüf ki, rəqibə çox top verdik və onlar bizə iki qol vurdular.
- Azərbaycan millisinin dünya çempionatındakı şanslarını necə qiymətləndirirsiniz?
- Turnirdə yaxşı komandalar çoxdur. Lakin Azərbaycan millisi ən güclü yığmalar arasındadır. Düzdür, kollektiv Bəhreynlə keçirilən ilk oyunda yaxşı mübarizə aparmadı, bu da üzərlərində olan təzyiqlə bağlı ola bilər. Ancaq bizə qarşı matçda çox şeyə qadir olduqlarını göstərdilər.
- Azərbaycan yığmasının heyətində bəyəndiyiniz futbolçular varmı?
- Elvin Əlizadə və Ramiz Çovdarovu fərqləndirə bilərəm. Elvin çox təcrübəli oyunçudur. Yəqin ki, yaşına görə bu, onun sonuncu turniri olacaq.
İdman.biz
