Idman.biz
"Çox güclü rəqibə qarşı oynadıq. İlk dövrədə də "Səbail"dən bir xal ala bilmişdik. Güclü heyətləri var, şərait baxımından bizdən üstündürlər. Bizim vəziyyətimiz isə hamıya məlumdur, problemlərimiz çoxdur".
Bu sözləri Birinci Liqa təmsilçisi "Şimal"ın kapitanı Tural Cəlilov deyib.
Təcrübəli futbolçu komandasının liqanın 12-ci turunda "Səbail"i məğlub etdikləri oyun haqda fikirlərini bölüşüb.
"Heyət olaraq güclənməliyik. Çempionatda 1-2 oyunu çıxmaq şərtilə bütün matçlarda yaxşı çıxış etmişik. Sadəcə, yaratdığımız epizodları boşa vermişik. Bu nəticə nə vaxtsa gəlməli idi ki, bu da "Səbail" ilə matça təsadüf etdi. Futbolçular sona qədər döyüşdü, yaratdığımız epizodlardan istifadə edib qələbə qazandıq. 3 xal bizim üçün önəmli idi. Tətilə qələbə ilə yollanmaq futbolçularda ruh yüksəkliyi yaradır. Fasilədə yeni transferlər etmək istəyirik. Mövsümün ikinci yarısında daha yaxşı olmalıyıq. Birinci Liqada ilk ilimiz olsa da, liqanı tərk eləmək istəmirik", - deyə o, sport24.az-a açıqlamasında deyib.
Qeyd edək ki, "Şimal" Birinci Liqada 12 turdan sonra 5 xalla turnir cədvəlində sonuncu pillədə qərarlaşıb.
