Idman.biz
"Everton" klubunun baş məşqçisi Şon Dayç jurnalistin "Mançester Siti"nin baş məşqçisi Pep Qvardiolanın futbolçular üçün tətbiq etdiyi pəhrizlə bağlı sualına ironik cavab verib.
İdman.Biz xəbər verir ki, Dayç futbolçularına Milad bayramı dövründə ciddi qadağalar tətbiq etmədiyini bildirib.
"Mən şəxsən futbolçularımın yemək rasionunu məhdudlaşdırmaq fikrində deyiləm və qantel, idman zalı mövzusunda fanatik deyiləm. Onlara sadəcə dedim ki, bayram günlərində ağıllı davransınlar - hər mənada, həm süfrədə, həm də başqa məsələlərdə. Qoy Miladdan zövq alsınlar, mən belə düşünürəm. O özü də komanda ilə birlikdə dietada olacaq? Yaxşı olardı ki, özü də etsin, sən də başla Pep", - deyə baş məşqçi vurğulayıb.
Dayç həmçinin jurnalistin sualına cavab olaraq Qvardiolanın özünün də Miladdan sonra tərəziyə çıxmasının maraqlı olacağını zarafatla qeyd edib.
