Idman.biz
İspaniyanın "Sevilya" futbol klubunun ətrafında gedən mülkiyyət dəyişikliyi danışıqları gözlənilməz istiqamət alıb.
İdman.Biz xəbər verir ki, ispan mediasının yazdığına görə, 39 yaşlı müdafiəçi və klubun yetirməsi olan Serxio Ramos "Sevilya"nın alınması ilə bağlı danışıqlara qoşulub və öz investisiya qrupuna rəhbərlik edir. Bildirilir ki, Ramosun rəhbərlik etdiyi qrupun təklifi səhmdarlara təqdim edilən variantlar arasında maliyyə baxımından ən sərfəlisidir.
Daha əvvəl klubun alınmasında əsas favorit kimi amerikalı konsorsium - yerli sahibkarlar Antonio Lappi və Fede Kinteronun təmsil etdiyi qrup göstərilirdi. Lakin maliyyə yoxlamasından sonra onların təklifində səhmlərin dəyəri aşağı salınıb və bu da danışıqların pozulmasına səbəb olub. Bu fonda Ramosun iştirakı olan layihə ön plana çıxıb və İspaniya millisinin sabiq kapitanı mümkün yeni idarəetmə modelinin əsas siması kimi nəzərdən keçirilir.
Qeyd olunur ki, dekabr ayında Meksikanın "Monterrey" klubundan ayrılan və azad agent statusunda olan Ramos futbolçu karyerasını bitirməyib və Avropaya qayıtmaq ehtimalını saxlayır. Mülkiyyət dəyişikliyi baş verərsə, onun "Sevilya"ya üçüncü dəfə qayıtması da istisna edilmir.
Xatırladaq ki, Serxio Ramos karyerasının əvvəlində "Sevilya"da çıxış edib, daha sonra isə 2023/2024 mövsümündə bir illik geri dönüş edib.
