Sport24.az
Misli Premyer Liqasının XIX turunda keçiriləcək "Şamaxı" - "Qarabağ" oyunu yubileylə əlamətdar olacaq. Sport24.az xəbər verir ki, bu, komandaların çempionatda 80-ci matçı kimi tarixə düşəcək.
"Şamaxı" daha əvvəl çempionatda "Xəzər Universiteti", "İnter", "Keşlə" adlandığı vaxt bu "Qarabağ"la üz-üzə gəlib.
Əvvəlki 79 qarşılaşmanın 41-də Ağdam klubu, 13-də hazırkı meydan sahibləri qələbə qazanıb. 25 görüşdə isə heç-heçə qeydə alınıb.
Topların nisbətində də "Qarabağ"ın aşkar üstünlüyü var - 115:46.
Bundan əlavə, "Şamaxı" Premyer Liqadakı son 24 oyunda rəqibini məğlub edə bilməyib. Sonuncu belə qalibiyyət 2018-ci il mayın 12-də qeydə alınıb. Həmin vaxt "Keşlə" "Qarabağ"ı üç cavabsız qolla üstələyib.
Qeyd edək ki, bu gün Şamaxı şəhər stadionunda baş tutacaq "Şamaxı" - "Qarabağ" oyunu saat 14:30-da start götürəcək. Ayxan Abbasovun baş məşqçisi olduğu kollektiv fevralın 5-də Azərbaycan Kubokunun 1/4 final mərhələsinin ilk oyununda Ağdam klubunu məğlub edə bilib - 1:0.
