Idman.biz
" Açığı, mən kənarda durmuşdum. 3 sarı vərəqəm var və artıq 5 oyundur ehtiyatlı olmağa çalışıram".
Bunu "Sumqayıt"ın hücumçusu Rüstəm Əhmədzadə futbolxeber.az-a müsahibəsində deyib.
Həmin müsahibəni təqdim edirik.
- Misli Premyer Liqasının 14-cü turunda "İmişli"ni 1:0 hesabı ilə məğlub etdiniz. Qələbəni necə şərh edərdiniz?
- Asan oyun olmayacağı gözlənilirdi. Çünki "İmişli" yaxşı komandadır. Xüsusən də əks-hücumlarda çox təhlükəli olurlar. Buna görə də matça çox ciddi hazırlaşmışdıq. Qol epizodları yaratmaq, fərqlənmək çətin idi. Lakin biz sona qədər inanırdıq. Yekunda da istəyimizə çatdıq və lazımi qolu vurduq.
- Matçdakı hesabı açsanız da, sonda komandanızın qapısına təyin olunan penaltiyə səbəbkar olmaqla bir anda antiqəhrəmana çevrilə bilərdiniz...
- Həqiqətən də çox emosional oyun oldu. Top istəmədən əlimə dəydi. Ümumi götürdükdə biz qələbəyə layiq idik. Bəlkə də buna görə bəxt bizim tərəfimizdə oldu.
- "İmişli" penaltini yerinə yetirərkən hansı hisslər keçirirdiniz?
- Çox narahat idim, çox həyəcanlanırdım. Bu matçda 3 xala ehtiyacımız var idi. Buna görə də zərbə anına heç baxa da bilmədim. Yaxşı ki, qol olmadı.
- İlk dövrədə də "İmişli" ilə matç dramatik alınmışdı. 0:1 hesabı ilə uduzsanız da, sonda texniki qələbə əldə etmişdiniz...
- Həmin görüşü yaxşı xatırlayıram. Çoxlu qol epizodu yaratsaq da, qalib gələ bilməmişdik. Sonra texniki qələbə əldə etdik. Bu, əlavə motivasiya idi. Çünki "İmişli"ni məğlub edib güclü olduğumuzu göstərmək istəyirdik. Lakin yenə də "İmişli"nin haqqını vermək lazımdır. Çox yaxşı komandadır. Heyətlərində də güclü futbolçuları var. Buna görə də çox gərgin oyun keçdi. Hətta yekunda dava da düşdü. Hər şey emosiyalarla bağıdır.
- Sizcə davaya səbəb nə idi?
- Açığı, mən kənarda durmuşdum. 3 sarı vərəqəm var və artıq 5 oyundur ehtiyatlı olmağa çalışıram. Qış fasiləsi ərəfəsində cəzalı duruma düşmək istəmirəm. Buna görə də dava olan tərəfə heç getmədim ki, birdən sarı vərəqə ilə cəzalanaram.
- Baş məşqçi Saşa İliç 4 oyunluq cəzalanıb. Onun ehtiyat oyunçular skamyasında olmaması siz futbolçulara nə dərəcədə təsir göstərir?
- Ciddi bir problem deyil. Tribunadan baş məşqçimizin tapşırıqlarını, göstərişlərini eşidirdim. Paltardəyişmə otağında da biryerdəyik.
- Son 5 oyunda 4 qələbə qazanmısınız. "Sumqayıt" bu formanı qış fasiləsinə qədər qoruya biləcək?
- Bəli, məqsədimiz budur. Qış fasiləsinə 2 tur qalıb. Hədəfimiz son iki matçda altı xal qazanmaqdır.
