Idman.biz
İspaniyanın "Barselona" futbol komandasının hücumçusu Lamin Yamalın uşaqlıq illərini keçirdiyi Rokafonda məhəlləsinin sakini Rosio Eskandell futbolçunun yerli gənclərin həyatına göstərə biləcəyi müsbət təsirdən danışıb.
İdman.Biz xəbər verir ki, uzun illərdir Yamalın ailəsini tanıyan və bir vaxtlar məhəllə sakinləri birliyinə rəhbərlik edən Eskandell bu barədə SPORT nəşrinə müsahibə verib.
Onun sözlərinə görə, gənc futbolçunun dünya səviyyəsində tanınması Rokafondada böyüyən uşaqlar üçün böyük motivasiya mənbəyidir.
"Burada futbol oynayan uşaq öz məhəlləsindən birinin dünya futbolunun zirvəsinə yüksəldiyini görəndə arzularının gerçəkləşə biləcəyinə daha çox inanır. Uğurun arxasında əmək, intizam, zəhmət və əzmkarlıq dayanır", - deyə Eskandell bildirib.
O, Yamalın qollarını qeyd edərkən göstərdiyi 304 rəqəminin artıq məhəllənin rəmzinə çevrildiyini vurğulayıb. Bu rəqəm Rokafondanın poçt indeksinin son üç rəqəminə işarə edir.
Eskandell hesab edir ki, futbolçunun məşhurluğu məhəllənin yalnız adını tanıtmaqla məhdudlaşmamalı, burada yaşayan insanların problemlərinə də diqqət çəkilməsinə kömək etməlidir.
"Rokafonda zəhmətkeş ailələrin, mağazaların, uşaqların və yaşadıqları mühiti yaxşılaşdırmaq üçün hər gün çalışan insanların məhəlləsidir. Söhbət Lamin Yamalın məhəllənin problemlərini həll etməli olmasından getmir. Çünki bu məsuliyyət dövlət qurumlarının üzərinə düşür. Əsas odur ki, onun səsi təşəbbüslərin, idman tədbirlərinin və gənclər üçün yeni imkanların yaradılmasına kömək edə bilsin", - deyə o bildirib.
Məhəllə sakini əsas problemlərdən biri kimi Yamalın təsviri olan divar rəsminin yaxınlığındakı futbol meydançasının vəziyyətini göstərib. Onun fikrincə, uşaqların ödəniş etmədən idmanla məşğul ola bildikləri bu məkanın yenilənməsinə ehtiyac var.
Eskandell sonda Yamala doğulduğu və böyüdüyü mühitlə fəxr etməyə davam etməyi tövsiyə edib.
"Rokafondanın yalnız Lamin Yamal sayəsində tanınması kifayət deyil. Dünya burada yaşayan insanları, onların bacarıqlarını və daha yaxşı gələcək qurmaq istəklərini də tanımalıdır", - deyə o fikrini tamamlayıb.
Qeyd edək ki, Lamin Yamal bu gün keçiriləcək İspaniya çempionatının "Real Madrid" - "Barselona" qarşılaşması ərəfəsində diqqət mərkəzindədir. Gənc futbolçu artıq bir neçə dəfə "El-Klasiko"da iştirak edib və Kataloniya təmsilçisinin əsas oyunçularından birinə çevrilib.
