Lent.az
Avropa Liqasında "Feyenoord"un "Real Betis2 komandasına 2-1 hesabı ilə məğlub olduğu oyunda baş məşqçi Robin van Persinin oğlu Şakel van Persi diz zədəsi alıb.
Lent.az-ın xarici mediaya istinadla xəbərinə görə, hadisədən sonra meydana qaçan Robin van Persinin emosional reaksiyası gecənin ən yaddaqalan anlarından biri olub. 19 yaşlı futbolçu cəmi 12 gün əvvəl "Sparta Rotterdam" derbisində əlamətdar oyun nümayiş etdirib. Lakin Avropa Liqasında baş verən bu zədə müvəqqəti olaraq bu yüksəlişi kölgədə qoyub.
"Feyenoord"un baş məşqçisi Robin van Persi Avropa Liqasının "Real Betis"ə qarşı oyununda həm idman, həm də emosional cəhətdən çətin anlar yaşayıb. Oğlu Şakel van Persinin zədələnməsi gecənin ən çox müzakirə olunan anı olub.
Avropa Liqasında "Real Betis"in qonağı olan "Feyenoord" 2-1 hesablı məğlubiyyətlə üzləşib. Bu nəticə Hollandiya komandasını turnirdən kənarlaşdırıb. Oyun təkcə hesabla deyil, həm də zədələrlə yadda qalıb.
Oyunun 74-cü dəqiqəsində "Feyenoord"un heyətində meydana çıxan 19 yaşlı Şakel van Persi dizindən zədə alaraq yerə yıxılıb. Gənc futbolçunun yerdəki ağrısı tribunadakı və ehtiyat oyunçular skamyasındakı azarkeşləri narahat edib.
"Feyenoord"un baş məşqçisi Robin van Persi oğlunun zədələndiyini görən kimi dərhal meydana girərək Şakelin yanına qaçıb. Tibbi heyətdən məlumat alan van Persinin olduqca emosional olduğu müşahidə edilib.
Oyundan sonra danışan Robin van Persi emosiyalarını gizlədə bilməyib: "Bu, çox kədərlidir. Bu, böyük bir ağrıdır. İlkin əlamətlər heç də yaxşı görünmür. Həm məşqçi, həm də ata kimi çox kədərliyəm".
