"Real Madrid" "Barselona"dan Neqreyra işi ilə bağlı maliyyə sənədlərinə çıxış istəyib

"Real Madrid" "Barselona"dan Hakimlərin Texniki Komitəsinin (CTA) keçmiş vitse-prezidenti Xose Mariya Neqreyraya ödənişlərlə bağlı sənədlərə və materiallara çıxış istəyib.

İdman.Biz bu barədə "AS"-a istinadla bildirib.

Mənbəyə görə, məhkəmədə xüsusi ittihamçı kimi çıxış edən Madrid klubu aşağıdakılarla maraqlanır: "Barselona"nın 2010-2018-ci illər arasında bu sənədlərin müəlliflərini və onların Kataloniya klubunun strukturundakı alıcılarını müəyyən edən daxili audit hesabatları; 2010-2018-ci illər arasında "Barselona" tərəfindən hazırlanmış və təsdiq edilmiş illik maliyyə hesabatları və müvafiq xarici müstəqil auditor hesabatları; "Dasnil 95, S.L.", "Nilsad, S.C.P.", "Soccercam, S.L.", "Best Norton, S.L.", "Tresep 2014, S.L." və "Radamanto, S.L." şirkətlərinə ödənişləri maliyyə baxımından araşdıran klubun Maliyyə İdarəetmə Komitəsinin iclaslarının protokolları.

Xatırladaq ki, 2023-cü ildə "blauqrana" İspaniya Kral Futbol Federasiyasında (RFEF) işləyən Neqreyraya ödənişlərdə rüşvət verməkdə ittiham olunub. "Barselona" 2001-2018-ci illər arasında təxminən 8,4 milyon avro məbləğində rüşvət ödəməkdə günahlandırılır.

Kataloniya klubunun məlumatına görə, Neqreyra hakimlər haqqında texniki hesabatlar hazırlamaq üçün xarici məsləhətçi kimi işə götürülüb. RFEF-in keçmiş vitse-prezidenti hakimlərə təsir göstərmək üçün rüşvət aldığını inkar edir.