Idman.biz
PSJ-nin baş məşqçisi Luis Enrike və hücumçusu Dezire Due Çempionlar Liqasının əsas mərhələsinin üçüncü turunda "Barselona" üzərində qazanılan 4:2 hesablı qələbəni dəyərləndiriblər.
İdman.Biz xəbər verir ki, ispaniyalı mütəxəssis komandasının müdafiədəki çıxışından razı qaldığını və mövsümdə məğlubiyyət tanımayan rəqibə qalib gəlməyin əhəmiyyətini vurğulayıb.
"Bu, inanılmaz rəqibə qarşı çox yüksək səviyyəli oyun idi. Müdafiə olunmaq bizim üçün çətin idi, amma əminəm ki, qələbənin açarı məhz bu oldu. Müdafiədə yaxşı işlədik. Cari mövsümdə məğlub olmayan komandanı yenməyi bacardıq. Onlar hər oyunda orta hesabla dörd qol vururdular, biz isə cəmi iki top buraxdıq", - deyə Enrike bildirib.
Baş məşqçi komandasının ikinci qolunu vuran Lukas Hernandesin çıxışını da xüsusi qiymətləndirib:
"Lukas təcrübəli, hər zaman hazır olan və böyük ambisiyalara malik futbolçudur. Oyundan əvvəl onun işinin öhdəsindən yaxşı gələcəyini bilirdik. Aqressiv oynayır, amma mənasız qayda pozuntularına yol vermir. O, dünyanın ən yaxşı futbolçularından birinə qarşı inanılmaz oyun keçirdi".
Görüşün 38-ci dəqiqəsində hesabı açan Dezire Due isə komandanın uğur qazanmaq əzmini ön plana çəkib.
"Meydanda bütün gücümüzü ortaya qoyuruq və nəticə göz qabağındadır. Qarşıda bizi daha vacib oyunlar gözləyir. Diqqətimizi qoruyuruq, qələbələrə acıq. Qoluma gəlincə, hər şeyi öz üzərimə götürməyə çalışmırdım, sadəcə öz futbolumu oynayırdım. Ən vacibi bu axşam qalib gəlmək idi", - deyə fransalı hücumçu söyləyib.
Qeyd edək ki, Parisdəki "Park de Prens" stadionunda keçirilən qarşılaşmada PSJ-nin qollarını Dezire Due, Lukas Hernandes, Vitinya və Fabian Ruis vurublar. "Barselona"nın heyətində isə Xavi Espart və Lamin Yamal fərqləniblər.
Bu qələbədən sonra PSJ xallarının sayını doqquza çatdıraraq Çempionlar Liqasının əsas mərhələsində liderlər qrupundakı mövqeyini qoruyub. "Barselona" isə altı xalda qalıb.
