"Oyunumuz yarımçıq qalmayıb. Sadəcə, vurulan təmiz qolumuzu hakin saymadı deyə, azarkeşlər kəskin etiraz etdlər. Təhlükəsizlik səbəbindən matç bir neçə dəqiqəqə dayandı. Amma bir qədər bərpa olundu". Bu sözləri Sport24.az-a açıqlamasında "İmişli" nin İdarə Heyətinin sədri Kamran Eyyubov deyib.
I Liqada çempionluq uğrunda mübarizə aparan 2 komandanın – "İmişli" – "Qaradağ Lökbatan" oyununda hakimlikdən narazı qalan yerli azarkeşlər etiraz etməyə başlayıb. Bu səbəbdən matçın hakimi İnqilab Məmmədov bir müddət oyunu saxlayıb və paltardəyişmə otağına yollanıb. Müəyyən fasilədən sonra isə görüş qaldığı yerdən davam edib.
"İmişli"nin İdarə Heyətinin sədrinin yaşananlara münasibəti belə olub: "İmişlidə çılğın futbol azarkeşləri var. Unutmayaq ki, bu rayonun vaxtilə "MKT-Araz" kimi iddialı klubu olub və avrokuboklarda oynayıb. O, komandada dağılandan sonra fanatlar uzun illədi futbola acdılar. Buna baxmayaraq, imişlilər bütün nəticələri mərdliklə qəbul etməyi bacaran və davranış qaydalarını bilən azarkeşlərdi. Dünənki qarşılaşmada fanatlarımız tərəfində kimlərəsə, o cümlədən hakimlərə qarşı fiziki təzyiq olmayıb".
Qeyd edək ki, dünən baş tutan görüş qolsuz başa çatıb. XXV turdan sonra aktivində 53 xal olan "Qaradağ Lökbatan" zirvədədi. "İmişli" isə 47 xalla ilk "üçlüyü" qapayır.
ABDULLA İSMAYILOĞLU