Idman.biz
"Oyunda yol verdiyimiz çoxsaylı səhvlər məğlubiyyətə səbəb oldu".
İdman.Biz bildirir ki, "İmişli" klubunun baş məşqçisi Jorj Kaşkilya Misli Premyer Liqasında "Qəbələ" ilə oyundan sonra bu fikri işlədib.
"Komandanın oyunundan ümumilikdə razı qaldım. Çünki oyundan əvvəl "Qəbələ"ni detallı şəkildə analiz etmişdik və bilirdik ki, onların sürətli futbolçuları var, daha çox uzun ötürmələrə üstünlük verirlər. Məhz bu oyun üslubunda üç qol buraxmaq qənaətbəxş deyil. Oyunda yol verdiyimiz çoxsaylı səhvlər məğlubiyyətə səbəb oldu", - baş məşqçi deyib.
Onun fikrincə, "Qəbələ" kimi ehtiraslı və dinamik oynayan komandaya qarşı bu cür səhvlərə yol vermək olmaz.
"Bu nəticə turnir cədvəlində mövqeyimizi bir qədər çətinləşdirdi. Çünki bu oyundan mütləq xal qazanmalı idik, amma bunu bacarmadıq.
Bununla belə, çempionat davam edir və qarşıda hələ kifayət qədər oyun var. Biz növbəti matça ciddi şəkildə hazırlaşacağıq, məşqlərimizi davam etdirəcəyik. Ümid edirəm ki, "Kəpəz"lə oyunda daha yaxşı və daha hazırlıqlı çıxış edəcəyik", - Kaşkilya əlavə edib.
Oyun 3:2 hesabı ilə "Qəbələ"nin xeyrinə qurtarıb.
