Sport24.az
"Bizim üçün yaxşı oyun alındı. Düzdür, ikinci hissədə müdafiəyə daha çox diqqət ayırdıq. Arxa xəttə demək olar ki, səhvə yol vermədik. Yekunda da 3 xal qazandıq. Təbii ki, qalib gəldiyimiz üçün şadıq".
Sport24.az saytının məlumatına görə, bu sözləri "Neftçi"nin yarımmüdafiəçisi İmad Faraj Azərbaycan Premyer Liqasının 19-cu turunda "Qəbələ"yə 1:0 hesabı ilə qalib gəldikləri oyundan sonra jurnalistlərə açıqlamasında deyib.
O, "Neftçi"nin yüksəlişdə olması fikrinə belə münasibət bildirib: "Məqsədimiz avrokuboklara vəsiqə qazanmaqdır. Ona görə də hər matça qələbə üçün çıxırıq. İnanıram ki, bu uğurlu çıxışı mövsümün sonuna kimi davam etdirəcəyik".
Fransız futbolçu növbəti turda "Kəpəz"ə qarşı keçirəcəkləri matçdan da söz açıb: "Kəpəz"lə oyun bizim üçün çox vacibdir. Çətin görüş olacaq. Səfərdə, süni qazonda oynayacağıq. Buna baxmayaraq, mütləq 3 xal qazanmalıyıq. Qələbə seriyasını davam etdirmək istəyirik".
İ.Faraj 21-ci turda "Qarabağ"a qarşı keçiriləcək matçın təxirə salınması ehtimalına da toxunub: "Bu barədə dəqiq məlumatım yoxdur. Bizim üçün oyunun tarixinin fərqi yoxdur. Məqsədimiz "Qarabağ"a qalib gəlməkdir".
