Sport24.az
Hazırda "Şəfa" klubunda çıxış edən "Neftçi"nin sabiq futbolçusu Emin Zamanov Sport24.az-a müsahibə verib
- Ötən ildən bu komandada çıxış edirsən. Bu qərarı verməyində əsas amil nə oldu?
- Düşünürəm ki, burada klubun gələcəklə bağlı düşüncələri, məqsədləri, planları böyük rol oynadı. Ötən mövsümdən bu kollektivdəyəm. Hazırda bu qərarı verdiyim üçün xoşbəxtəm.
- Komandada öz çıxışını necə qiymətləndirirsən?
- Məncə, bu barədə nəsə denəyim doğru olmaz. Məşqçilər heyəti daha yaxşı bilər.
- Bəs komandadakı rolundan necə razısan?
- Əlbəttə, razıyam. Müntəzəm olaraq oynayıram. Kluba xeyir verməyə çalışıram.
- Bir az keçmişə qayıdıb karyerandan danışaq. Sənin üçün ən çətin dövr hansı olub?
- Karyeramda hər dövrün öz çətinliyi var. Hər çətinlikdə yeni şeylər öyrənməyə çalışmışam. Düşünürəm ki, hər biri ayrı-ayrı vaxtlarda köməyimə də çatıb. Amma sırf bir klubu demək lazımdırsa, MOİK-də hərbi xidmətdə olduğum zaman deyə bilərəm.
- Daha gənc yaşlarında istedadlı futbolçulardan hesab edilirdin. Səncə, karyeranın parlaq olmasına nə mane oldu?
- Mənim də bir neçə səhvlərim olub. Hətta mənə qarşı doğru olmayan addımların atılması da buna təsir göstərib. Amma daha çox öz səhvlərimin səbəb olduğunu deyə bilərəm.
- "Neftçi"də keçirdiyin illəri necə xatırlayırsan?
- "Neftçi" komandasında olduğum zamanlarsa çox təcrübə qazanmışam. Bunlar hazırda da mənə kömək olur.
- İndi 28 yaşın var. Karyeranla bağlı planın nədir?
- Hazırda əsas məqsədim, "Şəfa" ilə I Liqada çempion olub Premyer Liqaya vəsiqə qazanmaqdır. Ən yaxşısını Allah bilir. İnşallah buna nail olaram.
- Yəqin ki, çempionluq asan başa gəlməyəcək. I Liqada sizə ən real rəqib hansıdır?
- Çempionluq üçün var gücümüzlə çalışırıq. I Liqada bütün komandalar hörmətə layiqdilər. Hər birinin üstünlükləri və öz yanaşmaları var.
