Idman.biz
Braziliyanın A Seriyasında çıxış edən "Botafoqo" klubunun baş məşqçisi Davide Ançelottinin komandadakı işi başa çatıb. Klub rəhbərliyi 5 aylıq fəaliyyətin ardından italiyalı mütəxəssislə əməkdaşlığa son qoymaq qərarı verib.
İdman.Biz ESPN-ə istinadla xəbər verir ki, "Botafoqo"nun bu addımı mövsüm ərzində gözləntilərin doğrulmaması ilə əlaqələndirilir.
Komanda həm "Copa Libertadores" turnirində erkən mərhələdə mübarizəni dayandırıb, həm də ölkə çempionatında titul uğrunda mübarizədən kənarda qalıb. Rəhbərlik mövcud nəticələri qənaətbəxş hesab etməyib və məşqçi dəyişikliyinə gedib.
Davide Ançelotti iyul ayında "Botafoqo"nun baş məşqçisi təyin olunmuşdu və bu, onun karyerasında ilk müstəqil baş məşqçi təcrübəsi idi. O, bundan əvvəl atasının – məşhur mütəxəssis Karlo Ançelottinin məşqçilər heyətində "Real Madrid" (İspaniya La Liqası), "Bayern" (Almaniya Bundesliqası), "Napoli" (İtaliya A Seriyası) və "Everton"da (İngiltərə Premyer Liqası) çalışmışdı.
Qeyd edək ki, "Botafoqo" rəhbərliyi yeni baş məşqçi ilə bağlı qərarını yaxın günlərdə açıqlamağı planlaşdırır.
