Idman.biz
İspaniyanın "Barselona" komandasının və Braziliya millisinin sabiq futbolçusu Dani Alveş Portuqaliyanın III divizionunda çıxış edən "San-Juan-de-Ver" klubunu satın almaq niyyətindədir.
İdman.Biz "Globo" nəşrinə istinadla xəbər verir ki, Alveş eyni zamanda növbəti altı ay ərzində peşəkar futbola qayıtmaq imkanını da nəzərdən keçirir.
İlkin plan futbolçunun həm meydanda çıxış etməsi, həm də klubda inzibati və idman yönümlü rəhbər funksiyaları yerinə yetirməsini nəzərdə tutur. O, debütünü və mümkün dönüşünü gələn mövsüm üçün planlaşdırır.
Qeyd edək ki, Dani Alveş 2023-cü ildən bəri rəsmi matçlarda iştirak etmir. O, İspaniyada cinsi zorakılıq ittihamı ilə həbs edilmiş, iş bir ildən artıq davam etmiş, 2024-cü ildə 4 il 6 ay müddətinə azadlıqdan məhrum edilmişdi. Lakin 2025-ci ildə sübutların yetərsizliyi səbəbilə hökm ləğv olunub.
Karyerası ərzində Alveş "Barselona" ilə altı dəfə İspaniya çempionu, üç dəfə Çempionlar Liqasının qalibi olub. O, "Sevilya" ilə iki dəfə UEFA Kubokunu, PSJ ilə isə iki dəfə Fransa çempionatını qazanıb.
