Idman.biz
"Çelsi"nin keçmiş kapitanı Con Terri London klubunun rəhbərliyini braziliyalı müdafiəçi Tiaqo Silvanı "Fluminense"dən geri qaytarmağa çağırıb.
İdman.Biz xəbər verir ki, Silva ailəsi Avropada yaşadığı üçün London klubuna qayıtmaq istəyir.
"Tiaqo Silva hazırdır. Məni dinləyin. O, futbol klubumuzla əla münasibətləri olan zəngin təcrübəyə malik bir insandır. İki uşağı akademiyamızda oxuyur. Şübhəsiz ki, Milad bayramında ailəsi ilə birlikdə Londona qayıdacaq. Onu yenidən klubumuzda görmək istərdim. Demirəm ki, hər həftə oynamalıdır, amma klubun bu cür oyunçularla birlikdə oynayaraq qazana biləcəyi təcrübə, yəqin ki, 2017-ci ildə çempionluğu qazandığımız Antonio Kontenin rəhbərliyi altında mənim oynadığım rolla müqayisə edilə bilər.
Mən oyunçular, məşqçi və sahiblər arasında bağlayıcı həlqə idim. Müəyyən dərəcədə təcrübəm var idi, bunun sayəsində çətin bir dövrdə nə deyəcəyimi və nə edəcəyimi bilirdim. Tiaqo Silvanın "Çelsi"yə qayıtması mən də daxil olmaqla hər kəsi çox şad edərdi. Mən sadəcə öz fikrimi deyirəm. Tiaqo, biz səni sevirik", - Terri "The Sun" qəzetinə bildirib.
Silva 2020-ci ildən 2024-cü ilə qədər "Çelsi"də oynayıb. London klubunda müdafiəçi 155 oyun keçirib, doqquz qol vurub, beş məhsuldar ötürmə edib və üç kubok qazanıb: Çempionlar Liqası, UEFA Super Kuboku və FIFA Klublararası Dünya Kuboku.
Bu mövsüm Silva klubun heyətində bütün yarışlarda 30 oyun keçirib, üç qol vurub və bir məhsuldar ötürmə edib.
Daha əvvəl mətbuat futbolçunun İngiltərədə yaşayan ailəsinə daha yaxın olan yerdə oyunçu karyerasını başa vurmaq üçün Avropaya qayıtmağı düşündüyü bildirilirdi.
