Idman.biz
"Barselona"nın prezidentliyə namizədi Mark Siria gələn ilki seçkilərdə qalib gələcəyi təqdirdə Lionel Messini kluba qaytarmaq üçün əlindən gələni edəcəyini bildirib.
İdman.Biz xəbər verir ki, Sirianın fikrincə, klub hazırkı maliyyə böhranından çıxmaq üçün mütləq Messini evə qaytarmalıdır.
"Əfsanələrimizin kluba qayıda bilməsini istəyirik, amma bunu gecənin bir yarısında, kənar gözlərdən gizlədərək etməməliyik. Buna nail olmaq üçün əlimizdən gələni edəcəyik. Messi bu klub üçün əvəzolunmaz fiqurdur. O, etibarlı bir dəstək sistemi və yaxşı təşkil olunmuş bir strukturla qayıtmalıdır. Messi ilə "Barselona" arasındakı münasibət Maykl Cordan və Nike arasındakı münasibətə bənzəməlidir. Bu, klubun kommersiya və institusional sahələrindən kənara çıxmalı, sponsorları və oyunçuların inkişafını əhatə etməlidir. Klub tarixinin ən yaxşı oyunçusu ilə çox şey edə və çox pul qazana bilərik. Hazırkı maliyyə vəziyyətimizdən çıxmaq istəyiriksə, onu evə gətirmək çox vacibdir", - ESPN Sirianın sözlərini sitat gətirib.
Messi 2000-ci ildən 2021-ci ilə qədər Kataloniya klubu sistemində oynayıb. Argentinalı 778 oyunda 672 qol vuraraq "Barselona"nın tarixinə ən çox qol vuran oyunçu kimi düşüb.
Messi həmçinin göy-qırmızılarda oynayarkən yeddi dəfə "Qızıl top" mükafatını qazanıb.
