Polşa millisinin sabiq futbolçusu Artur Vixnyarek yığmanın müdafiəçisi Timoteuş Puxaçın millidə üzləşdiyi vəziyyəti tənqid edib. O, "Sabah"ın futbolçusunun baş məşqçi Yan Urban tərəfindən ədalətsiz münasibətlə üzləşdiyini düşünür və oyunçuya bu barədə mütəxəssisdən izahat tələb etməyi məsləhət görüb.
İdman.Biz xəbər verir ki, Vixnyarek bu barədə "Kanał Sportowy"də danışıb.
Timoteuş Puxaç Polşa millisinin noyabr oyunları üçün heyətinə dəvət olunsa da, Rumıniya ilə qarşılaşmada meydana çıxmayıb. Baş məşqçi Yan Urban sol cinah müdafiəçisi mövqeyində debütant Oskar Kubyakı oynadıb, 27 yaşlı Puxaç isə bütün matçı ehtiyat oyunçular skamyasında keçirib.
Bu qərar Vixnyarekin narazılığına səbəb olub. Sabiq futbolçu hətta Puxaçın bir daha milliyə dəvət almayacağını düşündüyünü bildirib:
"Puxaçın adını sonuncu dəfə çəkirəm. Çünki düşünürəm ki, o, daha milliyə gəlməyəcək.
Mən onun yerində olsaydım və cəsarətim çatardısa, baş məşqçinin yanına gedib deyərdim:
"Məşqçi, əvvəlki oyunlarda və indi mənə qarşı tamamilə dəyərsiz bir insan kimi davrandığınız üçün çox təəssüflənirəm. Sol cinah müdafiəçisi kimi nəzərə alınmağım üçün daha nə etməli olduğumu bilmirəm".
Qeyd edək ki, Vixnyarek bundan əvvəl də Puxaçı açıq şəkildə müdafiə edib. O, noyabrın əvvəlində futbolçunun sentyabrda İsveçlə oyunda çətin vəziyyətə salındığını bildirmişdi. Həmin qarşılaşmada Urban "Sabah"ın müdafiəçisini sol cinah yarımmüdafiəçisi mövqeyində oynadıb. Halbuki Puxaç uzun müddətdir əsasən sol cinah müdafiəçisi kimi çıxış edir.
Futbolçu həmin matçın 65-ci dəqiqəsində əvəzlənib, baş məşqçi isə sonrakı görüşlərdə başqa variantlara üstünlük verib. Vixnyarek o zaman da məşqçinin bütün futbolçuları eyni meyarlarla qiymətləndirməli olduğunu, xüsusilə də onları öz mövqelərindən kənarda oynatdığı hallarda bunu nəzərə almalı olduğunu vurğulamışdı.
Puxaçın vəziyyəti onun "Sabah"da müntəzəm oynaması və Çempionlar Liqasında təcrübə qazanması baxımından da diqqət çəkir. Futbolçu noyabr toplanışından əvvəl yenidən şans qazanacağına ümid etdiyini və İsveçlə uğursuz oyunun əvəzini çıxmaq istədiyini bildirmişdi.
Polşa millisi noyabrın 17-də, çərşənbə axşamı, Vrotslavda İsveçlə qarşılaşacaq. Hələlik Yan Urbanın 27 yaşlı müdafiəçiyə bu görüşdə şans verib-verməyəcəyi məlum deyil.