Idman.biz
"Arsenal"ın baş məşqçisi Mikel Arteta Premyer Liqada "Everton" üzərində 2:0 hesablı qələbədən sonra komandasının müdafiəçilərinin çıxışını yüksək qiymətləndirib.
İdman.Biz BBC Sport-a istinadən xəbər verir ki, ispaniyalı mütəxəssis qələbədə həlledici rol oynayan Ezri Konsa, Qabriel Maqalyaes və Ben Uayt barədə fikirlərini bölüşüb.
Qarşılaşmada hesabı Konsa açıb. İkinci qolu isə Ben Uaytın ötürməsindən sonra başla Qabriel Maqalyaes vurub.
Arteta Konsanın komandaya uyğunlaşmasını və liderlik keyfiyyətlərini xüsusi qeyd edib:
"Onun xarakteri, aurası fərqlidir. Düşünürəm ki, onda kluba, komandaya və məşqçilər heyətinə dərhal uyğunlaşmağa kömək edən xüsusi bir cəhət var. Bu, onun göstərdiyi oyunda da özünü büruzə verir. O, hər matçda möhtəşəm çıxış edib. Liderlik bacarığı, xüsusilə bizim oyun üslubumuzda qarşılaşdığı çətin vəziyyətlərdə soyuqqanlılığını qoruması diqqət çəkir. Üstəlik, Qabi ilə çox güclü anlaşma yaradıb".
İspaniyalı mütəxəssis Qabriel Maqalyaesin zədə təhlükəsinə baxmayaraq, mübarizəni davam etdirməsini də yüksək qiymətləndirib:
"Qabi inanılmaz idi. Onun mümkün zədəyə səbəb olan epizoddan sonra həmin vəziyyətin öhdəsindən necə gəlməsi, yenidən mübarizəyə qoşulmaq istəyi və qol vurması çox şeydən xəbər verir. Bu, onun həm futbolçu, həm də klubun liderlərindən biri kimi xarakterini əla təsvir edir".
Arteta Ben Uaytın son illərdəki inkişafından da razılığını ifadə edib:
"Ben hazırda çox yaxşı formadadır. Bir neçə il əvvəl tanıdığımız Benlə indiki Ben arasında böyük fərq var. O, xeyli yetkinləşib. Bütün istiqamətlərdə inanılmaz inkişaf edib. Onun komandamızda olması bizim üçün böyük üstünlükdür".
