Idman.biz
Almaniya Futbol Liqası (DFL) uzunmüddətli əməkdaşlıq çərçivəsində "Adidas" şirkətindən 100 milyon avro (təxminən 200 milyon AZN) məbləğində kredit alıb.
İdman.Biz xəbər verir ki, aprelin 28-də təsdiqlənən sövdələşmə DFL-in icraiyyə komitəsi tərəfindən yekdilliklə qəbul edilib. Əldə olunan razılaşmaya əsasən, rəsmi top tədarükü ilə bağlı əvvəlcə 2026-2030-cu illəri əhatə edən müqavilə daha dörd il - 2034-cü ilə qədər uzadılıb.
Növbəti mövsümdən etibarən "Adidas"ın rəsmi topları Bundesliqa, İkinci Bundesliqa, Frans Bekkenbauer Superkuboku, Bundesliqaya vəsiqə uğrunda pley-off oyunları və yeni yaradılan U21 liqasında istifadə olunacaq.
DFL prezidenti Hans-Yoahim Vatske bu tərəfdaşlığın əhəmiyyətini vurğulayıb:
"Bu tərəfdaşlıq liqa üçün böyük məna kəsb edir və futboldan kənara çıxan bir nümunədir. "Adidas" və DFL alyansı Almaniya peşəkar futbolunun müsbət gələcəyinə töhfə verəcək".
