Idman.biz
"Formula 1" üzrə Azərbaycan Qran-prisinin marşalları artıq fəaliyyətə başlayıb.
İdman.biz-in məlumatına görə, dünyanın ən sürətli pilotları sabah Bakı küçələrinə çıxacaq və onların təhlükəsizliyini təmin edən əsas komanda – marşallar artıq hazırdır.
Bu il təxminən 1500 marşal yarışın təhlükəsizliyinə nəzarət edəcək. Onlar səhər saatlarından etibarən Atletlər kəndindən tras ərazisinə yola düşüb və postlarına yerləşərək yarış zamanı qarşılaşa biləcəkləri bütün vəziyyətlərə hazırlaşırlar.
Marşallar müxtəlif funksional qruplara bölünüblər: yanğın marşalları, bayraq marşalları, trek marşalları və digər dəstək komandaları. Hər bir qrupun öz vəzifəsi var, lakin bütün marşalların əsas məqsədi – pilotlar və azarkeşlər üçün təhlükəsiz və problemsiz yarış mühiti yaratmaqdır.
Bugün onlar tras boyunca gəzərək postları ilə tanış olub, təlimatlar alıb və müxtəlif ssenarilər üzrə hazırlıq məşqləri keçiblər. Hər bir marşalın rolu öncədən müəyyən olunub və bütün fəaliyyətlər təhlükəsizliyin maksimum səviyyədə qorunmasına yönəlib.
Qeyd edək ki, "Formula 1" marşalları yalnız Azərbaycanda deyil, bütün dünyada könüllülük prinsipi ilə fəaliyyət göstərir. Onlar yarışa olan böyük sevgi və maraqla qoşulur, bir çoxları üçün bu, peşəkar karyeradan daha çox fədakarlığın və motorsporta bağlılığın göstəricisidir.
Marşalların dəqiqliyi, intizamı və cəsarəti olmasa, "Formula 1" mümkün olmazdı. Onların səssiz zəhməti sayəsində pilotlar yüksək sürətdə mübarizə aparır, azarkeşlər isə trasın həyəcanını təhlükəsiz şəraitdə izləyə bilirlər.
Azərbaycan Qran-prisi 19–21 sentyabrda Bakının mərkəzi küçələrində keçiriləcək.
