Idman.biz
Sabiq "Formula-1" pilotu Felipe Massa 2008-ci ildə keçirilən Sinqapur Qran-prisində çempionluğunu Lüis Hemiltona uduzması səbəbindən 82 milyon dollar məbləğində təzminat tələb edib.
İdman.biz "The Times"a istinadən xəbər verir ki, iddia "Formula-1"in rəhbər orqanı olan FIA-ya və qurumun keçmiş baş direktoru Berni Ekklstouna qarşı irəli sürülüb.
Həmin yarışda Nelson Pikenin qəsdən törətdiyi qəza nəticəsində komanda yoldaşı Fernando Alonso birinci olub. Planlaşdırılmış qəza təhlükəsizlik avtomobilinin trasa çıxması səbəbindən Alonso finişə birinci çatıb. Lüis Hemilton 3-cü olaraq 6 xal qazanıb. Mövsümün lideri Massa isə Sinqapur Qran-Prisində 13-cü olduğundan xal qazana bilməyib.
O vaxt qüvvədə olan qaydalara əsasən, FIA Sinqapur yarışının nəticələrini ləğv etməli idi. Bu baş versəydi, Massa beş xal fərqi ilə çempion olmalı idi.
Qeyd edək ki, 44 yaşlı braziliyalı pilotun iddiasına oktyabrda Böyük Britaniyanın paytaxtı Londonda baxılacağı gözlənilir.
